,,საჯარო სამართლის იურიდიული პირის – შოთა რუსთაველის საქართველოს ეროვნული სამეცნიერო ფონდის დაფუძნებისა და მისი წესდების დამტკიცების შესახებ” საქართველოს განათლებისა და მეცნიერების მინისტრის 2010 წლის 28 ივლისის №62/ნ ბრძანებაში ცვლილებები განხორციელდა.
როგორც განათლების მინისტრ მიხეილ ჩხენკელის მიერ 12 ოქტომბერს ხელმოწერილ ბრძანებაში ვკითხულობთ, ფონდის წესდებაში ახალი ჩანაწერი გაჩნდა, რომელიც გულისხმობს, რომ „ფონდის სამეცნიერო საბჭო უფლებამოსილი ხდება, მოახდინოს საკუთარ უფლებამოსილებათა დელეგირება გენერალური დირექტორის მოადგილეზე ან/და გენერალური დირექტორის ბრძანებით განსაზღვრულ ფონდის სტრუქტურული ქვედანაყოფის ხელმძღვანელზე“.
ნიშნავს თუ არა ახალი ჩანაწერი, რომ შოთა რუსთაველის საქართველოს ეროვნული სამეცნიერო ფონდს ახალი ხელმძღვანელი და საბჭო რაღაც დროით არ ეყოლება, ამას მას შემდეგ გავიგებთ, რაც ახლანდელი ხელმძღვანელი, ჯაბა სამუშია, სავარაუდოდ, თბილისის სახელმწიფო უნივერსიტეტის რექტორის მოვალეობის შესრულებას 20 ოქტომბრის არჩევნების შემდეგ შეუდგება. როგორც ცნობილია, სამუშია ერთადერთი კანდიდატია, ვინც გიორგი შარვაშიძის გადადგომის შემდეგ, თსუ-ის რექტორის მოვალეობის შემსრულებლის კონკურსზე დარეგისტრირდა.
კიდევ ერთი ცვლილება, რომელიც ფონდის წესდებაში შევიდა მისამართს შეეხება და გაიწერა რომ ფონდის იურიდიული მისამართია: ქ. თბილისი, მ. ალექსიძის მე-2 შესახვევი №2.
ასევე იხილეთ:
The post რა ჩანაწერი გაჩნდა შოთა რუსთაველის სამეცნიერო ფონდის წესდებაში – განათლების მინისტრის ბრძანება first appeared on ყველაფერი განათლებისთვის და განათლებიდან | edu.aris.ge.
