განათლების, მეცნიერებისა და ახალგაზრდობის მინისტრს ჯერ არ დაუმტკიცებია 2025-2026 სასწავლო წლის სახელმწიფოს მიერ სრულად დაფინანსებული საბაკალავრო საგანმანათლებლო პროგრამების სია, ე.წ. უფასო ფაკულტეტები, რომელსაც 2025 წლის აბიტურიენტები მოუთმენლად ელიან. “უახლოეს პერიოდში იქნება!”, – ასე პასუხობს განათლების სამინისტრო აბიტურიენტის კითხვას.
ჩამონათვალის გამოქვეყნების ზუსტ დროს EDU.ARIS.GE-ს ვერც განათლების სამინისტრო უსახელებს და ვერც შეფასებისა და გამოცდების ეროვნული ცენტრი, თუმცა გვარწმუნებენ, რომ ე.წ. უფასო ფაკულტეტების გამოქვეყნების დროისთვის აბიტურიენტებს საკუთარ რეიტინგულ ჩამონათვალში საგანმანათლებლო პროგრამების დამატების შესაძლებლობა ჯერ ისევ ექნებათ.
„პირველადი შედეგების გამოქვეყნების შემდეგ, აბიტურიენტებს შეუძლიათ ამა თუ იმ საგანში აღებული ქულის გასაჩივრება – შეფასებისა და გამოცდების ეროვნული ცენტრისთვის აპელაციით მიმართვა. აპელაციის შედეგების გამოქვეყნებიდან მომდევნო დღის 18:00 საათამდე, აბიტურიენტებს აქვთ შესაძლებლობა, შეცვალონ პროგრამები – დაამატონ, გამოაკლონ, გადააადგილონ. ამ დროისთვის, საბოლოო პროგრამები, მათ შორის უფასო პროგრამები უკვე გამოქვეყნებულია ხოლმე“, – გვითხრეს შეფასებისა და გამოცდების ეროვნულ ცენტრში.
გარდა ამისა, გასული წლების მაგალითებით თუ ვიმსჯელებთ, სახელმწიფოს მიერ სრულად დაფინანსებული საგანმანათლებლო პროგრამების ჩამონათვალი რადიკალურ ცვლილებებს არ განიცდის, შესაბამისად, აბიტურიენტი, რომელიც დაინტერესებულია ე.წ. უფასო ფაკულტეტების არჩევით, უფლებამოსილია ისარგებლოს გასული სასწავლო წლის სიით და თავისი პრიორიტეტული პროგრამების საბოლოო განახლება მოგვიანებით გააკეთოს.
ასევე იხილეთ:
გაწევრიანდი ჯგუფში “აბი გლუკოზა აბიტურიენტებისთვის” და გაიგე ყველა საჭირო სიახლე
განახლებადი ინფორმაცია გამოცდების შესახებ
მარიამ იმერლიშვილი, edu.aris.ge
