მასწავლებლის მხარდაჭერის პროგრამის ფარგლებში, საჩხერის N2 საჯარო სკოლაში პროექტის „ინგლისური ენის სწავლა-სწავლების ხელშეწყობა მხატვრული ლიტერატურით“ შემაჯამებელი ღონისძიება გაიმართა.

პროექტი მასწავლებლის ეროვნული ჯილდოს ათეულთა კლუბი წევრის მაია ტყემალაძის მიერ განხორციელდა, რომელიც მიზნად ისახავდა საბაზო საფეხურზე მხატვრული ლიტერატურის გამოყენების გზით მოსწავლეების წიგნიერებისა და კრიტიკული აზროვნების, ცოდნის ტრანსფერის უნარის განვითარებას ინგლისურ ენაში.

შემაჯამებელი ღონისძიებაზე მოსწავლეებმა და კითხვის კლუბის წევრებმა წარმოადგინეს ინგლისურენოვანი სპექტაკლი „ტომ სოიერის თავგადასავალი“. ჩატარდა სამი მასტერკლასი მოწვეული სტუმრების მიერ. ერთ-ერთი მათგანი გაიმართა 2018 წლის მასწავლებლის ეროვნული ჯილდოს მფლობელის, მანანა კაპეტივაძის მიერ. ასევე, ფესტივალის ფარგლებში მოეწყო საჯარო მეტყველებისა და მოსწავლეების მიერ შექმნილი წიგნების კონკურსი.

პედაგოგიური პრაქტიკის გაუმჯობესებისკენ მიმართული საგრანტო კონკურსი კოალიციამ „განათლება ყველასათვის“ 2018 წლის ივნისის თვეში გამოაცხადა და მასში მონაწილეობა მიიღეს „მასწავლებლის ეროვნული ჯილდო“ 2017 წლის საუკეთესო ათეულის წევრებმა.

საგრანტო კონკურსი ხორციელდება „გუდავაძე პატარკაციშვილის ფონდის“ მხარდაჭერით. ფონდი კოალიციის ერთ-ერთი ძირითადი პარტნიორია 2017 წლიდან, როგორც „მასწავლებლის ეროვნული ჯილდოს“, ასევე სასკოლო საზოგადოების განვითარებისა და განათლების სისტემის გაუმჯობესებისკენ მიმართული პროექტების ფარგლებში.

ბატიაშვილის უწყებას 320 დღე დასჭირდა იმისათვის, რომ ექსპერტიზაზე გაგზავნილი, გამომცემლობა ,,დიოგენეს“ მიერ მოწოდებული ვიდეოფაილის ავთენტურობა დაედგინა. შეგასხენებთ, რომ ეს თემა სასკოლო სახელმძღვანელოების გრიფირების სკანდალს უკავშირდებოდა. კერძოდ კი, გამომცემლობა “დიოგენეს“ მიერ გავრცელებულ ინფორმაციას, სადაც საუბარი იყო განათლების მინისტრის ყოფილი მოადგილე (ამჟამინდელი სახელმწიფო მინისტრის მოადგილე) ლია გიგაურის დის მხრიდან ისტ–ის სახელმძღვანელოს სავარაუდო ლობირებაზე. ლალი გიგაური, სავარაუდოდ, გრიფირების კონკურსში შეტანილი სახელმძღვანელოს შექმნაში მონაწილეობდა და ამასთან, სავარაუდოდ იყო „დიოგენე“-ს გამომცემლობის მიერ მომზადებული ერთ-ერთი სახელმძღვანელოს რეცენზენტიც.

2019 წლის 5 მარტს ჩატარებული სამხარაულის ვიდეო ექსპერტიზის დასკვნის თანახმად (გვაქვს ასლი), რომლის ჩატარებამ ერთ დღეზე მეტი დრო არ დაიკავა – გამომცემლობა ,,დიოგენე“-ს მიერ განათლების სამინისტროში გაგზავნილი ვიდეოჩანაწერი „არ წარმოადგენს ორიგინალ ავთენტურ ჩანაწერს და ის მიღებულია მონტაჟის გზით“, „პირველად ვიდეოჩანაწერზე სპეციალური პროგრამული უზრუნველყოფის გამოყენებით დადებულია ე.წ. „ბანერები“ იმისათვის, რომ მომხდარიყო ბანერის ქვეშ განთავსებული მონაცემების დაფარვა..“ და ეს „ვიდეო-სამონტაჟო პროგრამის გამოყენებით არის განხორციელებული“.

მაგრამ, ეს ხომ ექსპერტიზის გარეშეც იყო ნათელი. ვიდეოს ყურების დროს ბანერებს, რომლებიც პერსონალურ ინფორმაციას ფარავენ, მარტივად ხედავ. რას აძლევს მაშინ სამინისტროს ექსპერტიზის პასუხი? რა დასკვნა შეიძლება გააკეთონ?  გამომცემლობა „დიოგენე”-მ ვიდეოჩანაწერი გააყალბა? სავარაუდოდ – არა, და აი აქ იწყება ყველაზე საინტერესო.

გამომცემლობა ,,დიოგენე“-ს დირექტორის თამარ ლებანიძის თქმით, ვიდეოფაილის სამი ვერსია არსებობს. კერძოდ: ბანერებით გადაფარებული მოკლე ვერსია, ბანერებით გადაფარებული ხანგრძლივი ვერსია და მთავარი – ერთი წლის წინ სსიპ-აღსრულების ეროვნული ბიუროს მიერ ფაქტად დაფიქსირებული ორიგინალი ვიდეოჩანაწერი.

ეს ზუსტად იმას ნიშნავს, რომ ვიდეოჩანაწერის და გუგლ დრაივიდან ამოღებული ფაილების ავთენტურობის შემოწმებას აზრი არასოდეს ჰქონდა. ეს თავიდანვე იყო აღსრულების ბიუროს მიერ დაფიქსირებული. ოდნავ გაუგებარია, თუ რატომ მოუხდა გამომცემლობა ,,დიოგენე“-ს აღსრულების ეროვნული ბიუროს მიერ დამოწმებული საბუთები განათლების სამინისტროსთვის მხოლოდ 2019 წელს, 21 მაისს გადაეგზავნა. სავარაუდოდ, ყველა გამომცემლობა მაინც სამინისტროზეა ნაწილობრივ დამოკიდებული და სულ მალე, ივნისში „ვინთერ ის ქამინგ“…

და მაინც, რა არის ჩაწერილი ვიდეოზე და რა იდო გუგლ დრაივზე? სავარაუდოდ, სახელმწიფო მინისტრის მოადგილე ლია გიგაურის და ლალი გიგაური, მის სავარაუდო მეგობრებთან ერთად, ერთ ჯგუფში არიან გაერთიანებული და ამ ჯგუფის საქაღალდეებში  სხვადასხვა ჯგუფის წევრების მიერ სხვადასხვა დროს ატვირთული ბევრი საბუთია – რეცენზიები სახელმძღვანელოებზე (რაც სავარაუდოდ სახელმძღვანელოების განხილვამდე ბევრი თვით ადრე არ უნდა გასულიყო განათლების სამინისტროს სისტემიდან), სავარაუდოდ გრიფირების პროცესის მონაწილეების კომენტარები, ასევე შეთანხმების პროექტი – „ინფორმაციული და საკომუნიკაციო ტექნოლოგიები, სასკოლო სახელმძღვანელოს ავტორთა შეთანხმება“, რომლის თანახმადაც, სახელმძღვანელოს ჰყავს ოთხი თანაავტორი, აქედან ერთი-ერთ თანაავტორად ჩაწერილია ლალი გიგაური, აქვე ვკითხულობთ: „მიუხედავად სახელმძღვანელოს თანაავტორების თანაბარი საავტორო უფლებებისა“…  „სახელმძღვანელოზე არ ეწერება ერთი თანაავტორი – ლალი გიგაური,  მანამ სანამ მას არ მიეცემა ამის იურიდიული უფლება“, მოცემულია ფულის გადანაწილების ფორმულა და სხვ.

უდანაშაულობის პრეზუმპცია არავის გაუუქმებია, ცხადია, არც ჩვენ ვცდილობთ ვინმეს დამნაშავეობის თუ უდანაშაულობის დამტკიცებას, მითუმეტეს, რომ საქმეში გარკვევის დაინტერესების თაობაზე განათლების სამინისტრომ არაერთხელ თავად განაცხადა.

სწორედ იმდროინდელმა განათლების მინისტრის მოადგილემ, თეიმურაზ მურღულიამ, „საჯარო ინტერესიდან გამომდინარე“ და ასევე, ვინაიდან საქმე „გრიფირების პროცესს მთლიანად ჩრდილს აყენებს“, სამსახურიდან გაშვებამდე 2 თვით ადრე, საქმეში გარკვევის ვალდებულება აიღო.

ზუსტად ამ საქმესთან დაკავშირებით, EDU.ARIS.GE-სთან საუბარში, ჯერ კიდევ ახალბედა მინისტრმა მიხეილ ბატიაშვილმა განაცხადა, რომ ამ საქმეს ბოლომდე მიიყვანს.

რა არის დასადგენი?

#1 საკითხი – ინტერესთა კონფლიქტი

საქართველოს განათლებისა და მეცნიერების მინისტრის 2017 წლის 16 თებერვლით დათარიღებული #28/ნ ბრძანების თანახმად, სახელმძღვანელოების გრიფირების წესით განსაზღვრულია, რომ ლალი გიგაურს, როგორც საკითხის განმხილველი უწყების ხელმძღვანელის მოადგილის დას, უფლება არ ჰქონდა მონაწილეობა მიეღო კონკურსში, როგორც სახელმძღვანელოს თანაავტორს. ანუ, მარტივად რომ ვთქვათ, თუ თქვენი და განათლების მინისტრის მოადგილეა, არ შეიძლება, რომ თქვენ იყოთ გრიფირებაზე წარდგენილი სახელმძღვანელოს ავტორი/თანაავტორი.

#2 საკითხი – ინფორმაციის გაჟონვა

როგორც ცნობილია, გრიფირების პროცესში სახელმძღვანელოების ავტორთა გამჟღავნება აკრძალულია იმ სპეციალისტებისა და ექსპერტებისთვის, ვინც სახელმძღვანელოებს აფასებს და დასკვნას წერს. აღნიშნულს კანონი ითვალისწინებს. ასევე, კანონით დაუშვებელია სახელმძღვანელოების შესახებ ინფორმაციის სამინისტროს სტრუქტურებიდან გაჟონვა. „დიოგენე”-ს მიერ მომზადებული ისტ–ის სახელმძღვანელოს შემთხვევაში კი, კონფიდენციალობა დაირღვა, რადგან ინფორმაცია სამინისტროდან გავიდა. კერძოდ, „დიოგენე“-ს მიერ გრიფირებისთვის წარდგენილი ისტ–ის სახელმძღვანელოების შესახებ ინფორმაცია გამომცემლობის კონკურენტებისთვის გახდა ხელმისაწვდომი. უფრო ზუსტად კი, ამ სახელმძღვანელოების ტექსტი და რეცენზენტთა შენიშვნები. ხოლო ამ ინფორმაციის გაჟონვა  მაშინ მოხდა, როცა ჯერ თავად „დიოგენე“-მაც არ იცოდა დაიწუნა თუ არა მისი სახელმძღვანელო განათლების სამინისტრომ. „დიოგენე“-ს სახელმძღვანელოს დაწუნების შესახებ ოფიციალურად გახდა ცნობილი გაჟონვიდან 5 თვის შემდეგ.

ინფორმაციის გაჟონვა რომ მოხდა, ამას მინისტრის ყოფილი მოადგილე თეიმურაზ მურღულიაც აღიარებს, უფრო სწორედ ამბობს, რომ იცის, თუ რომელი რეცენზენტის მასალა იყო ატვირთული გუგლ დრაივზე.

რას აკეთებს განათლების სამინისტრო:

საკუთარ თავზე აიღო ტექნიკურად რთული საქმის გამოძიება, სადაც შესაძლოა დადგეს მოცემულობა, რომ, სავარაუდოდ, ადგილი ჰქონდეს საქართველოს სისხლის სამართლის კოდექსით გათვალისწინებული დანაშაულის ნიშნების შემცველ ქმედებებს  – რატომ?

330 დღის განმავლობაში, ექსპერტიზის შედეგების მიუხედავად, ვერ მოამზადა საკუთარი დასკვნა იმჟამინდელი განათლების მინისტრის მოადგილე ლია გიგაურის დის, ლალი გიგაურის საქმეში შესაძლო მონაწილეობა-არ მონაწილეობაზე – რატომ?

სამინისტრო არც განცხადებას აკეთებს, რომ საქმე გადაცემულია პროკურატურაში – რატომ?

საჯარო ინფორმაციით მუდმივ მანიპულაციას ახდენს – რატომ?

EDU.ARIS.GE-მ, განათლების სამინისტროს, მოცემულ საქმეზე განცხადების გაკეთების ნებისმიერი ფორმა შესთავაზა. მათ შორის ისეთიც, რაც, სავარაუდოდ „ყოვლისშემძლე“ ლია გიგაურს და სისტემას სამინისტროზე ნაკლებად გაანაწყენებდა, შედეგად კი, მხოლოდ მინისტრის გაურკვეველი ბუტბუტი მივიღეთ – „რა ჩაიხვიეთ, გადაგზავნილია, გადაგზავნილია…“

რატომ ბატონო მინისტრო? რატომ ასე გაურკვევლად? რატომ ბუტბუტით?
გააკეთეთ განცხადება! ან შეხვდით მე-6 კლასის ისტ-ის სახელმძღვანელოს ავტორებს ნინო ჯამასპიშვილს და ხათუნა ნანობაშვილს, შეხედეთ მათ და გრიფირების გამჭირვალე პროცესებზე ისე ესაუბრეთ.

P.S.

თუ კარიკატურა მოგეწონებათ, ან მისი ამობეჭდვისა და კედელზე გაკვრის სურვილმა წაგძლიათ, დააწკაპეთ და ჩამოტვირთეთ.

ძვირფასო მეგობრებო, EDU.ARIS.GE  ზოგიერთი სხვა სახელმძღვანელოსათვის გრიფირების მინიჭების პროცესების შესწავლას იწყებს. ამ ეტაპზე ჩვენ ნინო ტალახაძის სახელმძღვანელოს „მე და საზოგადოება“-სთან დაკავშირებული საკითხების გადამოწმებას ვიწყებთ.

სასკოლო სახელმძღვანელოების გრიფირებასთან დაკავშირებული ნებისმიერი საინტერესო ინფორმციის ფლობის შემთხვევაში, დაგვიკავშირდით (032) 2192121 ან მოგვწერეთ grif@aris.ge-ზე, კონფიდენციალურობა გარანტირებულია.

ამავე თემაზე:

მინისტრის მოადგილის დას სახელმძღვანელოს ლობირებაში ადანაშაულებენ (ვიდეო)

განათლების მინისტრის მოადგილის ბრიფინგი (ვიდეო)

29 მაისს პროგრამის „ასწავლე საქართველოსთვის“ ფარგლებში ხულოს მუნიციპალიტეტის ორ სკოლას, მთისუბანსა და პანტნარში, ინგლისური ენის დისტანციური სწავლების მასწავლებლები ესტუმრნენ. ჩატარდა შემაჯამებელი და საჩვენებელი გაკვეთილები, რომელთაც სკოლის ადმინისტრაცია, ადგილობრივი პედაგოგები და მშობლები დაესწრნენ.

პროგრამა „ასწავლე საქართველოსთვის“ 2009 წლიდან ხორციელდება მასწავლებელთა პროფესიული განვითარების ეროვნული ცენტრის მიერ.

პროგრამაში ჩართული კონსულტანტ-მასწავლებლები საქართველოს მაღალმთიანი და ბარის შორეული სოფლების საჯარო სკოლებში ასწავლიან სხვადასხვა საგნობრივი ჯგუფის მიმართულებით.

დღეისათვის პროგრამაში 185 სხვადასხვა საგნობრივი ჯგუფის კონსულტანტ-მასწავლებელია ჩართული საქართველოს 10 რეგიონის 31 მუნიციპალიტეტის 103 სკოლაში.

პროგრამის ფარგლებში შეუვსებელი ვაკანსიების რაოდენობის მაღალი მაჩვენებელი ყოველწლიურად ინგლისური ენის მიმართულებით ფიქსირდება. შესაბამისად, პროგრამაში გაჩნდა დისტანციური სწავლების მეთოდის გამოყენების საჭიროება.

პროგრამის „ასწავლე საქართველოსთვის“ ფარგლებში ინგლისური ენის დისტანციური სწავლება საპილოტე რეჟიმში ხულოს მუნიციპალიტეტის ორ სკოლაში: მთისუბანსა და პანტნარში ხორციელდება.

ინლისური ენის დისტანციური სწავლების პედაგოგები პროექტის ფარგლებში ჩართული კონსულტანტ-მასწავლებლები არიან. ისინი ყოველ გაკვეთილს წინასწარ გეგმავენ და დისტანციურად ატარებენ სწავლების თანამედროვე მეთოდებისა და საინტერესო აქტივობების გამოყენებით.

საერთაშორისო დაცვის ქვეშ მყოფი პირისთვის გამოცდის ჩატარებისას, საგანმანათლებლო დოკუმენტის დასადასტურებლად, საგანმანათლებლო დაწესებულება უფლებამოსილია საფასური დამატებით განსაზღვროს.

საქართველოში გაცემული საგანმანათლებლო დოკუმენტების, ასევე საზღვარგარეთ მიღებული განათლების აღიარების წესისა და საფასურის გადახდის შესახებ, ბრძანებაში ცვლილებები შევიდა.

როგორც დოკუმენტში ვკითხულობთ, საქართველოში გაცემული უმაღლესი განათლების დამადასტურებელი სახელმწიფო დოკუმენტის, მათ შორის პროფესიული განათლების დამადასტურებელი სახელმწიფო დოკუმენტის, ნამდვილობის დადასტურების მიზნით ცენტრი ამოწმებს საგანმანათლებლო დოკუმენტის გაცემის უფლებამოსილებას, სწავლის პერიოდისა და საგანმანათლებლო დოკუმენტის სახელმწიფო აღიარებას და ამ დოკუმენტში ასახული კვალიფიკაციის შესაბამისობას საქართველოში არსებულ კვალიფიკაციებთან.  თავის მხრივ, დოკუმენტის ნამდვილობის დადასტურების დროს ცენტრი ადგენს პირისათვის მინიჭებულ კვალიფიკაციას ან პირის მიერ მიღებული განათლების კონკრეტულ კვალიფიკაციასთან გათანაბრების საკითხს.

„საქართველოში გაცემული უმაღლესი განათლების დამადასტურებელი სახელმწიფო დოკუმენტის/პროფესიული განათლების დამადასტურებელი სახელმწიფო დოკუმენტის ნამდვილობის დადასტურების მიზნით, პირის მიერ საგანმანათლებლო პროგრამის გავლისა და პირისათვის კვალიფიკაციის მინიჭების თაობაზე სათანადო დოკუმენტის გაცემის ფაქტს ადასტურებს პირის სახელზე გაცემული ამ მუხლის პირველი პუნქტით გათვალისწინებული დოკუმენტი, ხოლო საქართველოს კანონმდებლობის მოთხოვნებთან შესაბამისობის დადგენის დროს ცენტრი ამოწმებს საგანმანათლებლო დოკუმენტის გაცემის უფლებამოსილებას, სწავლის პერიოდისა და საგანმანათლებლო დოკუმენტის სახელმწიფო აღიარებას და ამ დოკუმენტში ასახული კვალიფიკაციის შესაბამისობას საქართველოში არსებულ კვალიფიკაციებთან. ნამდვილობის დადასტურების დროს ცენტრი ადგენს პირისათვის მინიჭებულ კვალიფიკაციას/პირის მიერ მიღებული განათლების კონკრეტულ კვალიფიკაციასთან გათანაბრების საკითხს”, – წერია ბრძანებაში.

ხოლო სკოლის გამოსაშვები გამოცდების საფუძველზე  გაცემული ატესტატის დადასტურებისას  ცენტრი ამოწმებს საგანმანათლებლო დოკუმენტის მფლობელის მიერ გამოსაშვები გამოცდების დაძლევის ფაქტს შესაბამის მონაცემთა ბაზაში.

„სკოლის გამოსაშვები გამოცდების საფუძველზე გაცემული სრული ზოგადი განათლების დამადასტურებელი სახელმწიფო დოკუმენტის (სრული ზოგადი განათლების ატესტატის) ნამდვილობის დადასტურებისას ცენტრი ამოწმებს საგანმანათლებლო დოკუმენტის მფლობელის მიერ გამოსაშვები გამოცდების დაძლევის ფაქტს სსიპ – განათლების მართვის საინფორმაციო სისტემის  მიერ ფორმირებულ ზოგადი განათლების დამადასტურებელი დოკუმენტის მიღების უფლების მქონე პირების მონაცემთა ელექტრონულ ბაზაში. აღნიშნულისგან განსხვავებულ საფუძველზე გაცემული ზოგადი განათლების დამადასტურებელი სახელმწიფო დოკუმენტის (ზოგადი განათლების ატესტატის) ნამდვილობის დადასტურებისას ცენტრი იკვლევს ზოგადსაგანმანათლებლო საქმიანობის განმახორციელებელი დაწესებულების სტატუსისა და საგანმანათლებლო დოკუმენტის მფლობელის სწავლის პერიოდის შესახებ ინფორმაციას (სახელმწიფოს მხრიდან აღიარებული საგანმანათლებლო პროგრამის დასრულების ფაქტს), მხოლოდ სწავლის ბოლო წლის მდგომარეობით”, – ვკითხულობთ ამავე ბრძანებაში.

საქართველოში გაცემული დიპლომებისა და სხვა ტიპის საგანმანათლებლო დოკუმენტების ნამდვილობის დადასტურებისთვის პირი წარადგენს ცენტრის მიერ დამტკიცებულ შესაბამისი განაცხადის შევსებულ ფორმას. განაცხადი და თანდართული დოკუმენტები ცენტრს შესაძლებელია წარედგინოს ფოსტით ან ვებ-გვერდით – www.my.gov.ge.

აღასანიშნავია, რომ თანდართული დოკუმენტები ცენტრს ქართულ ენაზე წარედგინება, უცხოენოვანის შემთხვევაში კი ნოტარიულად დამოწმებული თარგმანი ქართულ ენაზე.

ამავე ბრძანების მიხედვით, საერთაშორისო დაცვის სტატუსის მქონე პირისთვის, რომელმაც განათლება უცხოეთში მიიღო, დოკუმენტის დასადასტურებლად 70 ლარი განისაზღვრა.

„საერთაშორისო დაცვის შესახებ“ საქართველოს კანონით განსაზღვრული საერთაშორისო დაცვის სტატუსის მქონე პირის მიერ უცხოეთში მიღებული განათლების აღიარებისათვის – 70 ლარი. ამასთან, ის საგანმანათლებლო დაწესებულება, რომელიც ახორციელებს ამ ბრძანების პირველი პუნქტით დამტკიცებული წესის 5(1) მუხლის მე-5 პუნქტით გათვალისწინებული გამოცდის შეფასებას, უფლებამოსილია დამატებით განსაზღვროს საფასური, შესაფასებელი კვალიფიკაციის/სწავლის შედეგების თავისებურებების გათვალისწინებით”.

ასევე ბრძანებაში ათ პუქტადაა გაწერილი საერთაშორისო დაცვის სტატუსის მქონე პირის მიერ მიღებული განათლების აღიარების პროცედურა.

„მუხლი 5(1). საერთაშორისო დაცვის სტატუსის მქონე პირის მიერ მიღებული განათლების აღიარება

1. ცენტრი ახდენს საერთაშორისო დაცვის სტატუსის მქონე პირების მიერ უცხოეთში მიღებული განათლების აღიარებას, რაც გულისხმობს ამ პირების მიერ განათლების მიღების ფაქტის დადგენას და უცხოეთში მიღებული კვალიფიკაციის საქართველოში არსებულ კვალიფიკაციებთან თავსებადობის დადგენას.

2. ამ მუხლით დადგენილი რეგულაციები გამოიყენება მხოლოდ იმ შემთხვევაში, თუ საერთაშორისო დაცვის სტატუსის მქონე პირს არ შეუძლია, ცენტრში წარმოადგინოს მის მიერ უცხოეთში განათლების მიღების დამადასტურებელი დოკუმენტი.

3. ამ მუხლის პირველი პუნქტით გათვალისწინებულ შემთხვევაში, განათლების მიღების ფაქტის დადგენის მიზნებისათვის, განცხადებას უნდა დაერთოს მიღებული განათლების დამადასტურებელი განმცხადებლის ხელთ არსებული ყველა დოკუმენტი და/ან განმცხადებლის მიერ მიეთითოს ამ დოკუმენტებთან დაკავშირებულ ინფორმაციაზე.

4. ცენტრი განცხადების მიღების შემდეგ იწყებს ინფორმაციის მოძიებას საერთაშორისო დაცვის სტატუსის მქონე პირის მიერ უცხოეთში განათლების მიღების ფაქტის დასადგენად, რისთვისაც იგი უფლებამოსილია, ჩაატაროს ზეპირი მოსმენა საერთაშორისო დაცვის სტატუსის მქონე პირის ჩართულობით და/ან მიმართოს უცხო ქვეყნის კომპეტენტურ/შესაბამის ორგანოებს, რომლებიც აღიარებენ საერთაშორისო დაცვის სტატუსის მქონე პირის მიერ მიღებულ განათლებას.

5. ცენტრი, განმცხადებლის მიერ მითითებული საგანმანათლებლო დაწესებულების ჩართულობით, უზრუნველყოფს გამოცდის ჩატარებას, რომლის მიზანია, დადგინდეს, ფლობს თუ არა საერთაშორისო დაცვის სტატუსის მქონე პირი მის მიერ განაცხადში მითითებული კვალიფიკაციის შესაბამის ცოდნას, უნარებსა და კომპეტენციებს. გამოცდა ტარდება ქართულ ან რომელიმე უცხო ენაზე, საგანმანათლებლო დაწესებულებისა და განმცხადებლის შეთანხმების შესაბამისად.

6. ამ მუხლის მე-5 პუნქტით გათვალისწინებული გამოცდის ჩატარების წესი და საგამოცდო თემატიკა, საგანმანათლებლო დაწესებულებასთან შეთანხმების საფუძველზე, განისაზღვრება ცენტრის დირექტორის ინდივიდუალური ადმინისტრაციულ-სამართლებრივი აქტით, რომელიც განმცხადებელს უნდა გაეცნოს გამოცდის ჩატარებამდე 10 (ათი) სამუშაო დღით ადრე.

7. გამოცდის შედეგების გათვალისწინებით ცენტრი იღებს ერთ-ერთ შემდეგ გადაწყვეტილებას:

ა) საერთაშორისო დაცვის სტატუსის მქონე პირის მიერ მიღებული განათლების აღიარების შესახებ;

ბ) საერთაშორისო დაცვის სტატუსის მქონე პირის მიერ მიღებული განათლების ნაწილობრივ აღიარების შესახებ;

გ) საერთაშორისო დაცვის სტატუსის მქონე პირის მიერ მიღებული განათლების აღიარებაზე უარის თქმის შესახებ.

8. ამ მუხლის მე-7 პუნქტის „ა“ ქვეპუნქტით გათვალისწინებულ გადაწყვეტილებაში მიეთითება საერთაშორისო დაცვის სტატუსის მქონე პირის მიერ მიღებული განათლების შესაბამისობა ეროვნულ საკვალიფიკაციო ჩარჩოსთან.

9. ამ მუხლის მე-7 პუნქტის „ბ“ ქვეპუნქტით გათვალისწინებულ გადაწყვეტილებაში მიეთითება, თუ განათლების რა ნაწილია აღიარებული.

10. ჩატარებული ადმინისტრაციული წარმოების შედეგად, ამ მუხლის მე-7 პუნქტით გათვალისწინებულ ერთ-ერთ გადაწყვეტილებასთან ერთად, ცენტრი ადგენს საინფორმაციო ბარათს, სადაც მიეთითება:

ა) ბარათის შედგენის თარიღი;

ბ) საერთაშორისო დაცვის სტატუსის მქონე პირის მაიდენტიფიცირებელი პერსონალური მონაცემები (სახელი, გვარი და სხვა);

გ) მონაცემები შესაფასებელი კვალიფიკაციის შესახებ;

დ) განმცხადებლის მიერ მოწოდებული დამატებითი ინფორმაცია (უცხო ენების ფლობის, სამუშაო გამოცდილების შესახებ და სხვა.);

ე) ინფორმაცია ამ მუხლის მე-5 პუნქტით გათვალისწინებული გამოცდის შეფასების პროცედურის, შემფასებელი საგანმანათლებლო დაწესებულების შესახებ და შეფასების შედეგები.

11. ამ მუხლის მე-10 პუნქტში მითითებული საინფორმაციო ბარათი დგება ქართულ და ინგლისურ ენებზე და გადაეცემა განმცხადებელს განათლების აღიარების/ნაწილობრივი აღიარების/აღიარებაზე უარის თქმის დოკუმენტთან ერთად”.

აღნიშნული წესის რეგულირების სფეროდ განისაზღვრა საქართველოში გაცემული საგანმანათლებლო დოკუმენტების ნამდვილობის დადასტურების (გარდა ლეგალიზაციისა და აპოსტილით დამოწმებისა) პირობები და პროცედურა, ასევე უცხოეთში მიღებული განათლების აღიარების, ლიცენზირებულ უმაღლეს საგანმანათლებლო დაწესებულებაში ჩარიცხული პირების მიერ მიღებული უმაღლესი განათლების სახელმწიფო აღიარებისა და „საერთაშორისო დაცვის შესახებ“ საქართველოს კანონით განსაზღვრული საერთაშორისო დაცვის მქონე პირების (შემდგომში – საერთაშორისო დაცვის მქონე პირი) და საქართველოს ოკუპირებული ტერიტორიებიდან იძულებით გადაადგილებული პირების – დევნილების განათლების აღიარების პირობები და პროცედურა, ასევე ლიკვიდირებულ ან საგანმანათლებლო საქმიანობაშეწყვეტილ დაწესებულებაში განათლებამიღებული იმ პირების, რომლებიც ვერ ახერხებენ თავიანთი განათლების ან კვალიფიკაციის დადასტურებას.

ბრძანებას ხელს განათლების, მეცნიერების, კულტურისა და სპორტის მინისტრი მიხეილ ბატიაშვილი აწერს.

მოამზადა ანუკი წიწილაშვილმა

30 მაისს, გორის სახელმწიფო სასწავლო უნივერსიტეტში ევროკავშირის სადამკვირვებლო მისიის ხელმძღვანელის მოადგილის, ქალბატონ ქეით ფიერონის საჯარო ლექცია გაიმართა.

ლექციის თემატიკა იყო: ევროკავშირის მნიშვნელობა და მისიის მოკლე ისტორიული მიმოხილვა; საქართველოში ევროკავშირის მისიის საქმიანობა; მისიის მიერ მანდატის ფარგლებში განხორციელებული სამუშაოები, არსებული გამოწვევები და სამომავლო გეგმები.

როგორც უნივერსიტეტში აღნიშნავენ, ლექციის მიზანი იყო ევროკავშირისა და მისი სადამკვირვებლო მისიის შესახებ ცნობიერების ამაღლება და ახალგაზრდების დაინტერესება.

ლექციის შემდეგ გაიმართა დისკუსია.

სასტუმრო “თბილისი რუმსში” “სახელმწიფო ენა სამოქალაქო ინტეგრაციისა და ადამიანური კაპიტალის განვითარებისთვის საქართველოში” კონფერენცია მიმდინარეობს. შეხვედრა პრეზიდენტმა სალომე ზურაბიშვილმა გახსნა. მან ქართული ენის მნიშვნელობაზე ისაუბრა და ხაზი გაუსვა ასევე აფხაზური ენის დაცვის საკითხებს.

“ქართული ენა არის სახელმწიფო ენა, მაგრამ ჩვენ გვაქვს მეორე სახელმწიფო ენა, რომელსაც ასევე დაცვა სჭირდება. 26 მაისს ჩემს მიერ წარმოთქმულ სიტყვას მოყვა რეაგირება ე.წ აფხაზეთის მთავრობისგან, რომ რუსიფიკაციის საფრთხე არ გვემუქრებაო. ე.ი.საჭირი იყო ამ საკითხზე საუბარი. აფხაზური ენა არის ჩვენი დასაცავი. საქართველოში უფრო მეტ ადგილას ისწავლება აფხაზური ენა, ვიდრე აფხაზეთში”, – განაცხადა პრეზიდენტმა.

პარლამენტის განათლების, მეცნიერების და კულტურის კომიტეტის თავმჯდომარე მარიამ ჯაშის თქმით, აფხაზურთან ერთად ასევე დასაცავია ოსური ენა და განსაკუთრებით მნიშვნელოვანია, რომ საქართველოში მცხოვრებ ეროვნულ უმცირესობებთან კომუნიკაციის ენა არ იყოს რუსული.

“ვიდრე ჩვენი საერთო სალაპარაკო ენა არის რუსული, ოკუპაცია ვერ დამთავრდება. აფხაზურ ენასთან ერთად, ჩვენი დასაცავია ოსური ენაც”, – განაცხადა მან.

სახელმწიფო მინისტრ ქეთევან ციხელაშვილის განმარტებით, სახელმწიფო ბევრ სხვადასხვა პროექტს ახორციელებს ეროვნული უმცირესობების ინტეგრაციისთვის.

“2010 წლიდან 6-ჯერ გაიზარდა სტუდენტთა რიცხვი. სპეციალურად მათთვის შევიმუშავეთ სტაჟირების პროგრამა სახელმწიფო სტრუქტურებში. 200-ზე მეტმა ადამიანმა გაიარა უკვე ეს კურსი და სრულიად მზად არიან სამსახურისთვის”, – აღნიშნა მან.

კონფერენციაზე ხელი მოაწერეს ოთხმხრივ მემორანდუმს, რომელიც ეროვნულ უმცირესობებში სახელმწიფო ენის პოპულარიზაციის მიზნით, ახალი საგანმანათლებლო პროექტების განხორციელებას ეხება. ხელშეკრულება გაფორმდა ოთხ უწყებას შორის. ესენი არიან: სსიპ ზურაბ ჟვანიას სახელობის სახელმწიფო ადმინისტრირების სკოლა, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი. სახელმწიფო ენის დეპარტამენტი და საქართველოს პარლამენტის ეროვნული ბიბლიოთეკა.

თ.ვ.

უნივერსიტეტმა თავისი განვითარების სტრატეგია სწავლა-სწავლების პროცესში ახლებური მიდგომების, ახალი ფაქტორების გათვალისწინებითა და ინოვაციური კომპონენტების ჩართვით განსაზღვრა.

ამგვარი ინოვაციური კომპონენტია სტუდენტური ლექტორიუმი, რომელიც ცოდნის გაღრმავებასთან ერთად სტუდენტებს პროფესიული უნარ-ჩვევების გამომუშავებასა და კარიერულ წინსვლაში დაეხმარება.

ამასთან, სტუდენტური ლექტორიუმი სკოლის მოსწავლეებს განიხილავს როგორც საზოგადოების განვითარების მთავარ ფაქტორს, ამიტომ ის დაინტერესებულია მოსწავლეებთან კოოპერაციით, რაც, ერთი მხრივ, ხელს შეუწყობს სკოლის მოსწავლეების პროფესიულ ორიენტაციასა და ინფორმაციულ განვითარებას, მეორე მხრივ, სტუდენტთა სოციალური პასუხისმგებლობის ამაღლებას, რაც საზოგადოებისათვის თავისი ცოდნისა და გამოცდილების გადაცემას გულისხმობს.

სწორედ ამას ემსახურება სტუდენტურ ლექტორიუმში გაერთიანებული წარჩინებული სტუდენტების მიერ მოსწავლეებისათვის ჩატარებული საუბრები, მასტერკლასები, ღია გაკვეთილები.

24 მაისს, თბილისის 98-ე საჯარო სკოლის თხოვნით, უნივერსიტეტის სამართლის სკოლის საბაკალავრო პროგრამის წარჩინებულმა სტუდენტმა მეგი გუტაშვილმა უფროსკლასელთათვის ჩაატარა ღია გაკვეთილი – „დიპლომატიური ეტიკეტი“.

მან მოსწავლეებს გააცნო დიპლომატის პროფესია, დიპლომატიური ეტიკეტის წარმოშობის ისტორია, ელჩის კანდიდატურის შერჩევისა და დანიშვნის პროცედურა, დიპლომატიური რანგები, საქმიანი საუბრის წარმართვის ხერხები, დიპლომატიური დოკუმენტაციის შედგენის თავისებურებები და სხვა მათთვის საინტერესო საკითხები.

საუბრის დასასრულს, მეგი გუტაშვილმა მოსწავლეების შეკითხვებს უპასუხა.

დიპლომატიური ეტიკეტის საკითხებს სამართლისა და საჯარო მმართველობისა და პოლიტიკის სკოლის საბაკალავრო პროგრამის მე-3 კურსის სტუდენტები არჩევითი სასწავლო კურსის – „ზეპირი და წერითი ეტიკეტი ოფიციალურ ურთიერთობებში“, ფარგლებში სწავლობენ, სასწავლო კურსის ხელმძღვანელია ფილოლოგიის დოქტორი- მერი ლომია.

30 მაისს, კავკასიის საერთაშორისო უნივერსიტეტის იურიდიული კლინიკის ხელმძღვანელის მარინა კვაჭაძის ორგანიზებით, თბილისის უზენაეს სასამართლოში კსუ-ს სტუდენტების გასვლითი ტური გაიმართა.

სტუდენტები უზენაესი სასამართლოს თავმჯდომარის მოვალეობის შემსრულებელს მზია თოდუას შეხვდნენ, რომელმაც სტუდენტებს უზენაესი სასამართლოს ფუნქციონირება, უზენაესი მოსამართლისა და წევრების მუშაობის სპეციფიკა გააცნო, შემდეგ კი მათ კითხვებს უპასუხა.

ტურის ფარგლებში სტუდენტებმა უზენაესი სასამართლოს მატერიალურ-ტექნიკური ბაზა მოინახულეს. შეხვედრის დასასრულს კსუ-ს სტუდენტებს საჩუქრად „ბავშვის უფლებების განმარტების ლექსიკონი“ გადაეცათ.

28 მაისს, გრიგოლ რობაქიძის სახელობის უნივერსიტეტში ფრანკოფონიის საუნივერსიტეტო სააგენტოს (AUF) მხარდაჭერით, ჩატარდა საერთაშორისო სამეცნიერო კოლოკვიუმი ,,ქალი ძალაუფლებასა და მეცნიერებაში’’.

გახსნის ცერემონიალს უძღვებოდა კოლოკვიუმის ორგანიზატორი “ალმა მატერის” პროფესორი, საერთაშორისო პროგრამების კოორდინატორი თამარ გაგოშიძე. დამსწრე საზოგადოების წინაშე სიტყვით წარსდგნენ გრიგოლ რობაქიძის უნივერსიტეტის პროფესორი, საჯარო მმართველობის და პოლიტიკის სკოლის დეკანი ანა ფირცხალაშვილი, საფრანგეთის ელჩის მრჩეველი თანამშრომლობასა და კულტურის დარგში, საქართველოს ფრანგული ინსტიტუტის დირექტორი პიერ კლუე, ფრანკოფონიის საუნივერსიტეტო სააგენტოს რეგიონალური წარმომადგენელი თამარ ღარიბაშვილი, საქართველოს ფრანგული ინსტიტუტის პედაგოგი, პროფესორი ეკატერინე ჟორჟოლიანი და მოლდოვას რესპუბლიკის დელეგატი, პროფესორი აურიკა კირსანოვა.
კოლოკვიუმში მონაწილეობა მიიღო საქართველოს და მსოფლიოს რვა უნივერსიტეტის მეცნიერმა.

განათლების, მეცნიერების, კულტურის და სპორტის მინისტრის მოადგილე ირინა აბულაძის ინფორმაციით, მასწავლებელთა და მასწავლებლობის მსურველთა ზაფხულის გამოცდაზე უპრეცედენტო რაოდენობის აპლიკანტი დარეგისტრირდა.

“გამოცდაზე დარეგისტრირებულია 30 000 ადამიანი, ასეთი რიცხვი არასდროს ყოფილა. მათგან 10 ათასია ისეთი, ვინც არ ასწავლიან სკოლებში და სურვილი აქვთ შევიდნენ. რაც შეეხება პენსიონერ პედაგოგებს, რომლებმაც სურვილი გამოთქვეს დაწესებული ჯილდოს მიღების და სისტემის დატოვების, ინიციატივის გაჟღერებიდან ორი კვირის ვადაში, მათი რიცხვი 5000-ს უახლოვდება”, – განაცხადა ირინა აბულაძემ.

მოამზადა თამთა ვირსალაძემ

2019 წლის ერთიანი ეროვნული გამოცდების სახვითი და გამოყენებითი ხელოვნების გამოცდის დეტალების შესახებ, აბიტურიენტებისთვის აქტუალურ შეკითხვებს ჯგუფის ხელმძღვანელმა ნინო ხუნდაძემ უპასუხა.

“ნაეკი” გთვაზობთ ყველაზე აქტუალურ კითხვებსა და პასუხებს:

რას უნდა მიაქციონ ყურადღება უფრო მეტად აბიტურიენტებმა ამ საგნის გამოცდაზე?
ძალიან ხშირად აბიტურიენტები ყურადღებით არ კითხულობენ დავალების პირობას. ჩვენი რეკომენდაციაა, ზუსტად ის პასუხი გასცენ აპლიკანტებმა, რასაც დავალების პირობა მოითხოვს.

რა რეკომენდაციას მოგვცემდით გამოცდაზე კითხვასთან დაკავშირებით, რომელიც შეიცავს პასუხს „სწორია, ან „მცდარია“ ?!
ამ დავალებაში თუ თვლით, რომ პასუხი ჭეშმარიტია, უნდა მონიშნოთ ,,სწორია”, ხოლო როდესაც ნიშნავთ პასუხს ,,მცდარია”, აუცილებლად უნდა განმარტოთ კომენტარის სახით. წინააღმდეგ შემთხვევაში თქვენი პასუხი არ იქნება დამაკმაყოფილებელი.

ტესტი ისეთივე ფორმატის იქნება, როგორიც შარშან?
ხელოვნების ტესტის ფორმატი არ შეცვლილა.

გამსვლელი ქულა რამდენია?
აბიტურიენტებისთვის სახვითი და გამოყენებითი ხელოვნების მაქსიმალური ქულაა 80, ხოლო მინიმალური – 18.

განახლებადი ინფორმაცია გამოცდების შესახებ

განათლების, მეცნიერების, კულტურის და სპორტის მინისტრის მოადგილე ირინა აბულაძის განცხადებით, დაგეგმილია რომ  სკოლის დირექტორობის მსურველებს, შესაბამისი ანაზღაურების სანაცვლოდ, მთიან რეგიონებში მუშაობა შესთავაზონ.

ამის შესახებ მინისტრის მოადგილემ ერთ-ერთ კონფერენციაზე ეთნიკური უმცირესობებით დასახლებული რეგიონის პედაგოგის შეკითხვის საპასუხოდ განაცხადა.

სამოქალაქო განათლების მასწავლებლის შეკითხვა საპენსიო ასაკის პედაგოგებს და იგივე ასაკის დირექტორებს შეეხებოდა. კონკრეტულად მას აინტერესებდა, ხომ არ აპირებს სახელმწიფო ჩაუტაროს ტრენინგები პედაგოგებს, რომლებიც ჯილდოს მიიღებენ, რომ თანხების ეფექტურად გამოყენება შეძლონ. „არ იციან როგორ გამოიყენონ ეს თანხები, იყო შემთხვევები, როცა დევნილებისთვის კომპენსაციები დარიგდა, უფრო დიდი თანხები და ხალხმა ეფექტურად ვერ გამოიყენა ეს თანხები და არასწორად დააბანდეს“, – განაცხადა პედაგოგმა.

მისივე თქმით, იმის გამო რომ სამინისტროს მიერ წარდგენილ სქემაში აღნიშნულია, რომ საჭიროების შემთხვევაში სკოლა ხელშეკრულებას პრაქტიკოს პედაგოგსაც გაუფორმებს, მასწავლებლების ნაწილი თავს იკავებს სქემიდან გასვლაზე. კითხვა იყო ასევე საპენსიო ასაკის დირექტორთან დაკავშირებით, რომელიც პრაქტიკოსი პედაგოგია. პედაგოგი დაინტერესდა შეუძლია თუ არა მას აიღოს ჯილდო და გააგრძელოს დირექტორის საქმიანობა.

ირინა აბულაძემ საპასუხოდ განმარტა, რომ სტატისტიკის გაანალიზების შემდეგ ამ კუთხით სამინისტრო იმუშავებს.

„ვაანალიზებთ სტატისტიკას, თუ რამდენმა ადამიანმა გამოთქვა სურვილი სისტემის დატოვების, რომ შემდეგ გადავწყვიტოთ, თუ რით უნდა დავეხმაროთ ამ ადამიანებს. დავიწყებთ მუნიციპალიტეტებთან და საერთაშორისო ორგანიზაციებთან მუშაობას, რომ მოვიფიქროთ თუ რითი დავეხმაროთ, რომ ფუნქცია არ დაკარგონ. ჩვენ ჩანაწერი, რომ ისინი სისტემიდან გავიდნენ შეგნებულად არ გვაქვს ამ ეტაპზე. 12 ათასი საპენსიო ასაკის პედაგოგი გვყავს და წარმოიდგინეთ ყველა რომ სისტემიდან გავიდეს, ჩვენ ამ ეტაპზე ვერ შევძლებთ უზრუნველყოფას, რომ  მასწავლებლის დანაკლისი შევავსოთ, იმის ხარჯზეც, რომ სხვა მასწავლებლები გადაინაწილებენ საათებს.

„ამისკენ უნდა წავიდეთ ეტაპობრივად. პირველი ნაბიჯები გადადგმულია 10 ათასი მასწავლებლობის მსურველია დარეგისტრირებული. დარწმუნებული ვარ, მომავალ წელს კიდევ უფრო ბევრი ადამიანი იქნება. ეს უნდა იყოს უმტკივნეულო პროცესი, ყველა ადამიანისთვის. თქვენ იცით, რომ იყო მცდელობები ასეთი ადამიანების ძალით გაშვების, არ გამოდის ამ სისტემაში ძალადობა. ის ისევ უკან გვიბრუნდება ჩვენ, სახელმწიფოს, დირექტორებს და მოსწავლეებს. ასე ეტაპობრივად და შესაძლებლობების გაჩენით გამოთავისუფლებულ ადგილებზე მოხდება ეს ჩანაცვლება“, – განაცხადა ირინა აბულაძემ.

მისივე თქმით, შემოდგომაზე იგეგმება დირექტორთა სერტიფიცირების ახალი წესის შემუშავება, რა დროსაც გარკვეული სიახლეები იქნება წარმოდგენილი.

„პენსიონერი დირექტორებთან დაკავშირებით ასეთი ჩანაწერი არ არსებობს. ჩვენ ვმუშაობთ პარალელურად დირექტორთა სქემაზე და მათ პროფესიულ განვითარებაზე. შემოდგომაზე გვინდა დავდოთ დირექტორთა სერტიფიცირების ახალი მოდელი. დირექტორებს რომლებიც ახლა სისტემაში არიან, 2020 წლის გაზაფხულზე გასდით ვადა. გვყავს ბევრი მოვალეობის შემსრულებელი დირექტორები. მათთვის, ვისაც აქვს განათლების სექტორში მუშაობის გამოცდილება და აქვს უნარები, რომ მართოს სკოლა წავიდეს მაღალმთიან სოფლებში, რეგიონული განვითარების სამინისტროსთან ვმუშაობთ და ვფიქრობთ, რომ პროგრამა რომელიც აქვს მასწავლებელთა პროფესიული განვითარების ცენტრს “ასწავლე საქართველოსთვის”, რომელიც აგზავნის მაღალმთიან სოფლებში კონკრეტული დანამატით მასწავლებლებს, ანალოგიური ავამუშაოთ დირექტორებისთვისაც.

საქართველოს სკოლების 70 პროცენტს 200-ზე ნაკლები მოსწავლე ჰყავს. ამიტომ, განსაკუთრებული მიდგომა იქნება მანდაც მოსაფიქრებელი, არის პენსიონერი დირექტორები, არის სკოლები სადაც არავინ არ მიდის სამუშაოდ“, – განმარტა მინისტრის მოადგილემ.

„სკოლის დირექტორების სერტიფიცირების ახალ ტალღას შემოდგომაზე ვგეგმავთ“ – ირინა აბულაძე

მოამზადა თამთა ვირსალაძემ

საქართველოს განათლების, მეცნიერების, კულტურისა და სპორტის მინისტრის  ინიციატივით, სასკოლო ექსკურსიებთან დაკავშირებით ორგანიზატორებისთვის რეგულაციები გამკაცრდა და ინდივიდუალური ადმინისტრაციული აქტით დარეგულირდა ექსკურსიებში მონაწილე მხარეების უფლება-მოვალეობები და პასუხისმგებლობები.

ახალი მიდგომით, სკოლას დაევალა გადამყვანი კომპანიისგან/ფიზიკური პირისგან მოითხოვოს მძღოლის კვალიფიკაციისა და ავტომანქანის ტექნიკური გამართულობის დამადასტურებელი დოკუმენტები. სკოლის დირექცია დაგეგმილი ექსკურსიის თარიღის, ლოკაციის, აქტივობების, მონაწილე არასრულწლოვანი და სრულწლოვანი პირების შესახებ სრულად უნდა იყოს ინფორმირებული. ექსკურსიის ორგანიზატორი/ხელმძღვანელი შესაძლოა იყოს მოსწავლის წარმომადგენელი, მასწავლებელი ან სკოლაში დასაქმებული სხვა პირი;

ექსკურსიის ხელმძღვანელს  სრულყოფილად  უნდა ჰქონდეს მონაწილე მოსწავლეებისა და მშობლების მონაცემები, მათ შორის, ინფორმაცია მონაწილე მოსწავლის სპეციალური საჭიროებების შესახებ.  აუცილებელია ჯგუფის შემადგენლობაში შედიოდეს სრულწლოვანი პირი, რომელსაც პირველადი სამედიცინო დახმარების აღმოჩენის უნარ-ჩვევა ექნება. ბავშვების კვების მიზნით საკვები პროდუქტების ტრანსპორტირება უნდა ხორციელდებოდეს სანიტარული პირობების დაცვით. ექსკურსიის განხორციელების წესის დაცვა სავალდებულოა როგორც სკოლის, ასევე, მშობლების მიერ სასკოლო დროს ორგანიზებულ ექსკურსიებზე. აღნიშნული წესის დარღვევისას გათვალისწინებულია საქართველოს კანონმდებლობით დადგენილი წესით პასუხისმგებლობა.

აღნიშნული წესი უკვე დაეგზავნა ყველა ზოგადსაგანმანათლებლო დაწესებულებას და სამინისტრო მოუწოდებს ყველა საჯარო და კერძო სკოლას, რომ აღნიშნული აქტის ყველა მუხლი  ზედმიწევნით დაიცვან.

აქვე აღვნიშნავთ, რომ საქართველოს განათლების, მეცნიერების, კულტურისა და სპორტის სამინისტრომ  შრომის, ჯანმრთელობისა და სოციალური დაცვის სამინისტროსთან ერთად ჯერ კიდევ 2016 წელს  შეიმუშავა ექსკურსიების ორგანიზებასთან დაკავშირებული რეკომენდაცია, რაც ასევე სავალდებულო იყო ზოგადსაგანმანათლებლო დაწესებულბებისთვის, თუმცა, არ ვრცელდებოდა მშობლების მიერ სასკოლო დროს ორგანიზებულ ექსკურსიებზე.

იხილეთ ინდივიდუალური ადმინისტრაციული აქტი:

ზოგადსაგანმანათლებლო დაწესებულებების მოსწავლეთა ექსკურსიების განხორციელების წესი

1. ზოგადსაგანმანათლებლო დაწესებულებების მოსწავლეთა ექსკურსიების განხორციელების წესი (შემდგომ – წესი) განსაზღვრავს ზოგადსაგანმანათლებლო დაწესებულებების მოსწავლეთა ექსკურსიების დაგეგმვის, განხორციელების, აგრეთვე მოსწავლეების, მათი წარმომადგენლების, მასწავლებლების და ექსკურსიის განხორციელებაში მონაწილე პირთა უფლება-მოვალეობებს და პასუხისმგებლობებს.
2. ეს წესი ვრცელდება სკოლისა და მშობლების მიერ სასკოლო დროს ორგანიზებულ ექსკურსიებზე.
3. წესში გამოყენებულ ტერმინებს ამ წესის მიზნებისთვის აქვს შემდეგი მნიშვნელობა:
ა) ექსკურსია – სკოლის მიერ გასართობი, შემეცნებითი-სასწავლო მიზნებისათვის სასკოლო დროს განხორციელებული აქტივობა, რომელიც მოიცავს მოსწავლეთა, მოსწავლის წარმომადგენელთა და მასწავლებელთა ტრანსპორტით გადაადგილებას მათ მიერ განსაზღვრულ ლოკაციაზე კანონმდებლობით დადგენილი წესის შესაბამისად.

ბ) ექსკურსიის ორგანიზატორი – სრულწლოვანი პირი, რომელიც ორგანიზებას უწევს ექსკურსიას. ორგანიზატორი შესაძლებელია იყოს მოსწავლის წარმომადგენელი, მასწავლებელი ან სკოლაში დასაქმებული სხვა პირი;

გ) ექსკურსიის ხელმძღვანელი – სრულწლოვანი პირი, რომელიც უშუალოდ მონაწილეობს კონკრეტულ ექსკურსიაში და პასუხისმგებელია მგზავრობის პროცესში და ექსკურსიის ლოკაციაზე მოსწავლეთა უსაფრთხოებაზე. ექსკურსიის ხელმძღვანელი შესაძლებელია ამავდროულად იყოს ექსკურსიის ორგანიზატორი;

დ) მოსწავლე – პირი, რომელიც საქართველოს კანონმდებლობით დადგენილი წესით ირიცხება ზოგადსაგანმანათლებლო დაწესებულებაში;

ე) მოსწავლის წარმომადგენელი – მშობელი, მეურვე ან სხვა კანონიერი წარმომადგენელი;

ვ) სასკოლო დრო – სასკოლო სასწავლო გეგმით განსაზღვრული პროცესის, აგრეთვე სკოლის მიერ ინიცირებული, ორგანიზებული, კონტროლირებული, დაფინანსებული ნებისმიერი ღონისძიების მიმდინარეობის დრო.

4. წესში გამოყენებულ სხვა ტერმინებს აქვს საქართველოს კანონმდებლობით განსაზღვრული მნიშვნელობა.

მუხლი 2. ექსკურსიის ორგანიზატორისა და ხელმძღვანელის მოვალეობები

1.ექსკურსიის ორგანიზატორი/ხელმძღვანელი პასუხისმგებელია მგზავრობის პროცესში და ექსკურსიის ლოკაციაზე მოსწავლეთა უსაფრთხოებაზე, რისთვისაც იგი გამოითხოვს და სკოლის დირექტორს/დირექტორის მოვალეობის შემსრულებელს ექსკურსიამდე არანაკლებ 10 დღით ადრე წარუდგენს ტრანსპორტის გამართულობის დამადასტურებელ დოკუმენტს, მძღოლის პირადობის დამადასტურებელი დოკუმენტისა და შესაბამისი კატეგორიის ავტომანქანის მართვის უფლების დამადასტურებელი მოწმობის ასლს, ინფორმაციას ექსკურსიის მიზნების, დაგეგმილი აქტივობების, მონაწილე პირების (მათ შორის, მცირეწლოვნების), პასუხისმგებელი პირების, ექსკურსიის თარიღისა და ლოკაციის შესახებ.
2. სკოლის დირექტორი/დირექტორის მოვალეობის შემსრულებელი განიხილავს წარდგენილ ინფორმაციას/დოკუმენტებს და იღებს გადაწყვეტილებას ექსკურსიის განხორციელების შესახებ გონივრულ ვადაში.
3. ექსკურსიის ორგანიზატორი ვალდებულია მოსწავლეს, მის წარმომადგენელს და ექსკურსიაში მონაწილე სხვა პირებს მიაწოდოს სრულყოფილი ინფორმაცია ექსკურსიის თარიღის, ლოკაციის, დაგეგმილ ღონისძიებათა მიზნების, აქტივობების და მონაწილე და პასუხისმგებელი პირების შესახებ.
4. ექსკურსიის ორგანიზატორს უნდა ჰქონდეს მოსწავლის მშობლის წერილობითი თანხმობა ექსკურსიაში მოსწავლის მონაწილეობის შესახებ, თუ მოსწავლის წარმომადგენელი არ ახლავს მას ექსკურსიაზე.
5. ექსკურსიაში მონაწილე სრულწლოვან პირთა შორის უნდა იყოს სულ მცირე ერთი ქმედუნარიანი პირი, რომელსაც აქვს პირველადი სამედიცინო დახმარების აღმოჩენის უნარ-ჩვევები.
6. ექსკურსიის ხელმძღვანელს სრულყოფილად  უნდა ჰქონდეს მონაწილე მოსწავლეებისა და მშობლების მონაცემები, მათ შორის, ინფორმაცია მონაწილე მოსწავლის სპეციალური საჭიროებების შესახებ.

მუხლი 3. ტრანსპორტირების წესი

1.მოსწავლეების, მშობლებისა და მასწავლებლების ექსკურსიაზე ტრასპორტირება უნდა განხორციელდეს კანონმდებლობით დადგენილი მოთხოვნების დაცვით, ფიზიკური ან იურიდიული პირის მიერ იმ სატრანსპორტო საშუალებით, რომელსაც გავლილი აქვს ტექდათვალიერება კანონმდებლობით დადგენილი წესით.
2. სატრანსპორტო საშუალებას უნდა მართავდეს შესაბამისი გამოცდილებისა და სათანადო კატეგორიის მართვის მოწმობის მქონე მძღოლი.
3. სატრანსპორტო საშუალებაში უნდა იყოს განთავსებული პირველადი სამედიცინო დახმარების ჩანთა.
4. მოსწავლეთა ტრანსპორტირებისას მათი კვების მიზნით საკვები პროდუქტების ტრანსპორტირება უნდა ხორციელდებოდეს სანიტარული პირობების დაცვით.
5. შეზღუდული შესაძლებლობის მქონე არასრულწლოვანთათვის ტრანსპორტირება უზრუნველყოფილი უნდა იყოს მათი საჭიროების გათვალისწინებით.

მუხლი 4. პასუხისმგებლობა

ამ წესით გათვალისწინებული მოთხოვნების დარღვევა გამოიწვევს პასუხისმგებლობას საქართველოს კანონმდებლობით დადგენილი წესით.

პარლამენტის განათლების, მეცნიერების და კულტურის კომიტეტის თავმჯდომარე მარიამ ჯაშის განცხადებით, სახელმწიფო ენასთან დაკავშირებით, პარლამენტს, საგაზაფხულო სესიაზე რამდენიმე ინიციატივა გადაეცემა. როგორც დეპუტატი აღნიშნავს, ახალი ცვლილებებით გაიზრდება ენის სახელმწიფო პალატის ფუნქციები და მას საჯარო წარწერების მონიტორინგი დაევალება. ცვლილებები გულისხმობს ასევე საჯარო მოხელეებისთვის აფხაზური და ოსური ენის შემსწავლელი კურსების შემუშავებას.

“მიმდინარე საგაზაფხულო სესიის განმავლობაში ენასთან დაკავშირებით მნიშვნელოვან ინიციატივას წარვადგენთ, რომელიც სამ ძირითად საკითხს შეეხება. პირველი გახლავთ საჯარო ინფორმაციისთვის განკუთვნილი როგორც ქართული, ასევე არაქართული წარწერების სტანდარტის დაცვა და სახელმწიფო ენის დეპარტამენტის როლი გაიზრდება ამ კუთხით. გვაქვს ინიციატივა, რომ სახელმწიფო ენის დეპარტამენტი უშუალოდ გახდეს უწყება, საჯარო ონფორმაციისთვის განკუთვნილი მრავალეროვანი წარწერების ხარისხის უზრუნველყოფის როგორც სალიტერატურო, ასევე ტრანსლიტერაციის მოვლენების დაცვის თვალსაზრისით.

“მეორე მიმართულება გახლავთ აფხაზური ენის, მეორე სახელმწიფო ენის შესწავლის სამეცნიერო განვითარებისთვის შესაბამისი საკანონმდებლო ბაზის შემუშავება. ეს უაღრესად მნიშვნელოვანია. საბედნიეროდ, ქართულ სკოლებში არის სივრცე, სადაც ისწავლება აფხაზური ენა, თუმცა საჯარო სექტორში ეს არ გვაქვს. ამიტომ, მინდა ვთხოვო “ჟვანიას სკოლას” შევიმუშაოთ საჯარო მოხელეებისთვის აფხაზური და ოსური ენების შემსწავლელი კურსები. ეს შეიძლება არ იყოს მაღალ პროფესიულ დონეზე, მაგრამ საჯარო მოხელეები აუცილებლად უნდა ფლობდნენ.

“მუნიციპალიტეტების დონეზე, სახელმწიფო ენის პალატის ფუნქციები გაძლიერდება, რომ ჩვენ რეკლამის და საჯარო წარწერების მონიტორინგის სისტემები შევიმუშაოთ”, – განაცხადა მარიამ ჯაშმა სახელმწიფო ენის განვითარების საკითხებთან დაკავშირებულ კონფერენციაზე სიტყვით გამოსვლისას.

მოამზადა თამთა ვირსალაძემ

თბილისის ივანე ჯავახიშვილის სახელობის სახელმწიფო უნივერსიტეტში „დანაშაულის პრევენცია, ქართულ-ნორვეგიული პერსპექტივები“ სემინარი ჩატარდა, რომლის ფარგლებში ნორვეგიელი პროფესორის ტორე ბიორგოს წიგნის – „დანაშაულის პრევენცია, ყოვლისმომცველი მიდგომა“ პრეზენტაცია გაიმართა. წიგნი „ქართულ-ნორვეგიული კანონის უზენაესობის ასოციაციის“ მიერ ითარგმნა.

როგორც „ქართულ-ნორვეგიული კანონის უზენაესობის ასოციაციის“ თავმჯდომარე გიორგი გიორგაძემ განაცხადა, ქართულ ენაზე მსგავსი ლიტერატურის სიმწირე საკმაოდ შემაფერხებელი ფაქტორია სტუდენტებისთვის, რომლებიც სამართლის მიმართულებით იღებენ განათლებას. ამიტომ, ტორე ბიორგოს ამ გამორჩეული ნაშრომის თარგმნა ახალგაზრდებს მნიშვნელოვან დახმარებას გაუწევს.

„დღევანდელი სემინარი ტარდება ქართულ-ნორვეგიული კანონის უზენაესობის ასოციაციისა და თბილისის სახელმწიფო უნივერსიტეტის იურიდიული ფაკულტეტების თანამშრომლობის ფარგლებში. ჩვენ უკვე 5 წელია ვთანამშრომლობთ და ამ თანამშრომლობის ფარგლებში მოხდა ცნობილი ნორვეგიელი კრიმინოლოგის, პროფესორი ტორეს ბიორგოს წიგნის „დანაშაულის პრევენცია – ყოვლისმომცველი მიდგომა“ ქართულად თარგმნა. ბატონი ტორე ჩვენთან იმყოფება და თვითონ წარადგენს ამ წიგნს. რაც ყვლაზე მნიშვნელოვანია, წიგნი გახდება სასწავლო, სავალდებულო მასალა კრიმინოლოგიის სწავლებისთვის თბილისის სახელმწიფო უნივერსიტეტში. ეს ძალზე წინგადადგმული ნაბიჯია იმ კუთხით, რომ ქართულ ენაზე ნაკლებად არის ხელმისაწვდომი ყოვლისმომცველი ნამუშევრები ამ დარგში“, – განაცხადა გიორგი გიორგაძემ.

სემინარის ფარგლებში ასევე გაიმართა „ქართულ-ნორვეგიული კანონის უზენაესობის ასოციაციის“ პერიოდული გამოცემის, „ქართული სამართლის ჟურნალის“პრეზენტაცია. როგორც ღონისძიებაზე ითქვა, ეს ჟურნალიც მოწოდებულია იმისკენ, რომ მოხდეს სამართლებრივი კვლევების ხელშეწყობა და კლასიფიკაცია სტუდენტებს შორის, რათა მათ აქტიურად შეძლონ აქტუალურ სამართლებრივ საკითხებზე მუშაობა. ჟურნალი გამოდის ბეჭდური და ელექტრონული სახით, როგორც ქართულ ასევე ინგლისურ ენაზე.

სემინარზე ქართველ სტუდენტებს საკუთარ წიგნზე ტორე ბიორგოც ესაუბრა. მან დამსწრე საზოგადოებას დანაშაულის პრევენციის საკითხში ნორვეგიული და საერთაშორისო გამოცდილება გაუზიარა. მისი თქმით, წიგნში მოცემულმა მიდგომებმა მნიშვნელოვნად გააუმჯობესა კრიმინოგენული ვითარება ნორვეგიაში და იმედი გამოთქვა, რომ ქართული სამართლებრივი სივრცეც გამოიყენებს ამ გამოცდილებებს.

„ქართულ-ნორვეგიული კანონის უზენაესობის ასცოციაცია“ 2014 წელს დაარსდა და მას შემდეგ აქტიურად აგრძელებს ამ მიმართულებებით მუშაობას. ტორე ბიორგოს ნაშრომი „დანაშაულის პრევენცია – ყოვლისმომცველი მიდგომა“ უკვე მესამე წიგნია, რომელიც მათი ხელშეწყობით ქართულ ენაზე ითარგმნა. როგორც ორგანიზაციის წარმომადგენელები აცხადებენ, მუშაობას მომავალშიც აუცილებლად გააგრძელებენ.

მალე გამოცდები გაქვთ და თქვენი შესაძლებლობების მაქსიმალურად გამოვლენა გსურთ? ტესტირებისთვის მომზადება საკმაოდ რთულია. აპლიკანტები ხანდახან იმასაც კი ვერ ვხვდებით, თუ საიდან ჯობს დაწყება. თუმცა მეხსიერების, კონცენტრაციისა და ხასიათის გასაუმჯობესებელი ხრიკები ნამდვილად არსებობს.

ჩვენ ნეირობიოლოგების, ფსიქოლოგებისა და დიეტოლოგების რჩევებს თავი მოვუყარეთ. ასევე პედაგოგებისა და სტუდენტების აზრიც გავითვალისწინეთ და მათ საფუძველზე რჩევების ჩამონათვალი შევადგინეთ. აღნიშნული რეკომენდაციები კონცენტრაციის მობილიზებასა და მოსამზადებელი პერიოდის გაუმოჯობესებაში დაგეხმარებათ.

საუზმე და ,,საკვები ტვინისთვის“

სხეულს სწორი ფუნქციონირებისთვისა და კონცენტრაციისთვის ენერგია სჭირდება. მის საკმარის მარაგს კი გლუკოზა განაპირობებს. კვლევების თანახმად, მოსწავლეები, რომლებიც საუზმობენ, გამოცდებზე უკეთეს შედეგს აჩვენებენ, ვინაიდან მათ კონცენტრაცია და ინფორმაციის გახსენება არ უჭირთ. სწორედ ამიტომ, დღე ნახშირწყლების მიღებით უნდა დაიწყოთ. შეგიძლიათ შვრიის ფაფა, ან შაქრის დაბალი შემცველობის მქონე მიუსლი მიირთვათ. ასევე მნიშვნელოვანია რაციონის ცილებით გამდიდრება: ცოტაოდენი რძე, იოგურტი ან კვერცხვი.

მიირთვით ტვინისთვის „გამოცდილი“ საკვები. ესენია კვერცხი, ცხიმიანი თევზი (სკუმბრია, ორაგული ან სარდინები, რომელიც ომეგა-3 არის მდიდარი), მარცვლეული, კომბოსტო, ისპანახი, ბროკოლი (და საერთოდ ყველა მუქი მწვანე ფოთლოვანი ბოსტეული), პომიდორი და ავოკადო.  გაითვალისწინეთ, რომ სასმელი, რომელიც ანტიოქსიდანტებსა და ანტოციანებს შეიცავს მეხსიერებისა და ხასიათის გაუმჯობესება შეუძლია. ისინი შეიძლება შეიცავდეს მოცვს, მარწყვს, თხილს, ზეითუნს, და შავ შოკოლადს, რომელიც თქვენ სხეულსა და გონებას კვებავს.

ადრე დაიწყეთ…

გამოცდისთვის მომზადება მის თარიღამდე ბევრად ადრე დაიწყეთ. ასე თავს უფრო მშვიდად იგრძნობთ და ინფორმაციის უაზროდ დაზეპირებაც არ მოგიწევთ. მეცადინეობას დასვენებულ ტვინზე, დილაობით გირჩევთ. სასწავლი მასალის დიდი ნაწილი დღის მეორე ნახევრისთვის არ მოიტოვოთ, ვინაიდან ამ დროს თქვენ დაღლილი იქნებით. შეეცადეთ სამეცადინო გრაფიკი ისე გაწეროთ, რომ  ამ საქმით ყოველ დღე ერთსა და იმავე დროს დაკავდეთ. 

გადაწყვიტეთ რაზე უნდა გაამახვილოთ ყურადღება

თქვენ წერითი, ზეპირი თუ პრაქტიკული გამოცდა გელით? თითოეულ მათგანს განსხვავებული მომზადება და მიდგომა ჭირდება. ამიტომ გამოცდის ფორმატი აუილებლად გაარკვიეთ. ასე თქვენ ზუსტად გეცოდინებათ თუ როგორ მოემზადოთ მისთვის. იმ შემთხვევაში, თუ თემა უნდა დაწეროთ, შეიძლება ყველა საკითხის მოცვა არც დაგჭირდეთ. ასეთ დროს ერთ თემაზე ფოკუსირებასა და მის სიღრმისეულ შესწავლას გირჩევთ. ხოლო თუ თქვენ გამოცდაში იქნება ტესტები, რომელთაც პასუხის რამდენიმე ვარიანტი აქვს, უფრო ფართო სასწავლო პროგრამის მომზადება მოგიწევთ.

შეადგინეთ გეგმა

ეს შეიძლება შრომატევად საქმედ მოგეჩვენოთ, მაგრამ კომპლექსური გეგმის შედგენით დროს ნამდვილად დაზოგავთ. თქვენ ერთი წუთის დახარჯვაც კი არ მოგიწევთ იმაზე, რომ გადაწყვიტოთ ზუსტად რა ისწავლოთ. გეგმა რაც შეიძლება დეტალურად გაწერეთ, ნებისმიერი გადასახედი დეკუმენტისა ან შენიშვნის ჩათვლით  და მიყევით მას. არ დაგავიწყდეთ დროის გამოყოფა ურთიერთობისთვის, სპორტისთვის და ნებისმიერი სხვა შესვენებისთვის.

ინტერვალები შეიძლება თქვენი საუკეთესო მოკავშირეები გახდნენ

აუცილებლად გადაანაწილეთ თქვენი მეცადინეობები და დაზეპირებაზე არც იფიქროთ. ბევრად უკეთესია მეცადინეობას ათი დღის განმავლობაში თითო საათი დაუთმოთ, ვიდრე საგანი ერთ დღეში ათი საათის განმავლობაში იზეპიროთ. ინფორმაციის დამახსოვრებისთვის დრო არის საჭირო და დამტკიცებულია, რომ ამისთვის ინტერვალების მეთოდი ყველაზე ეფექტურია. ის ,,სწავლისა და მეხსიერების სფეროს ექსპერიმენტული კვლევების მთელ ისტორიაში ერთ-ერთ ყველაზე სანდო სტრატეგიად“ არის დასახელებული. თუმცა გახსოვდეთ, რომ ის გამოცდის ყველა ტიპს შეიძლება არ მოუხდეს. რაც შეეხება დამახსოვრების სხვა მეთოდებს, შეგიძლიათ სცადოთ ინტერვალურ გამეორებაზე დაფუძნებული ფლეშ ბარათები, ასოციაციური ბარათები, ჯგუფური სამუშაოები და საუბრის ჩაწერები,მათი შემდგომი მოსმნით.

გამოცადეთ საკუთარი თავი

წამყვანი ფსიქოლოგებისა და ნეირობიოლოგების თქმით ,,თვითტესტირება“ ინფორმაციის ასათვისებლად ერთ-ერთი ყველაზე ეფექტური ხერხია. ეს ტექნიკა მასალის გააზრებაში, და არა მის უაზროდ დაზეპირებაში, დაგეხმარებათ. საკუთარი თავის შემოწმების ერთ-ერთი საუკეთესო ხერხია საცდელი ტესტირების გავლა. ასევე შეგიძლიათ მასალის მორიგი გამეორების შემდეგ საკუთარ თავს კითხვები დაუსვათ.

გახდით მასწავლებელი

გაინტერესებთ რა უნდა ქნათ თუ მასალა დაისწავლეთ და საკუთარი თავი შეამოწმეთ კიდეც? ამის შემდეგ შეგიძლიათ თქვენი ცოდნა სხვებს გაუზიაროთ და ასწავლოთ.

მასწავლებლობა კარგად ნაცნობი ტექნიკაა და ,,პროტეჟეს ეფექტის“ სახელით არის ცნობილი. ეს მიდგომა თქვენ მეხსიერებასა და დამახსოვრების შესაძლებლობას ასტიმულირებს. იმისათვის რომ სხვას ასწავლოთ თქვენ ცოდნას ზუსტი ორგანიზაცია უნდა გაუწიოთ.

იყავით გონიერი და შეინახეთ თქვენი ტელეფონი

ტელეფონები საჭიროა, მაგრამ არა სწავლის დროს. სოციალური ქსელები თქვენ ყურადღებას გაფანტავს და თან გდევთ ,,რაღაც მნიშვნელოვანის გამოტოვების შიში“

(ინგლ. Fear of missing out ან FOMO). დამტკიცებულია, რომ რაც უფრო მეტ დროს ატარებთ ტელეფონთან, მით დაბალია თქვენი ნიშნები. ნუ მოატყუებთ საკუთარ თავს, რომ მას მაგიდაზე დატოვებთ და ხელს არ მოკიდბთ.

ნაკლები მუსიკა, მეტი სიჩუმე

სტუდენტები, რომლებიც მშვიდ გარემოში სწავლობენ, მასალას უკეთესად იმახსოვრებენ. ეს რჩევა განსაკუთრებით ინტრავერტებმა უნდა გაითვალისწინონ. ექსტრავერტებთან შედარებით ისინი ფონად ჩართულ მუსიკაზე უფრო ერთობიან.

რეგულარული შესვენება, სუფთა ჰაერი და ფიზიკური ვარჯიშები

ეფექტური მეცადინეობა შეუწყვეტელს არ ნიშნავს. მეცადინეობებს შორის შესვენება სასწავლი მასალის დამახსოვრების მეტ შანსს იძლევა. თქვენი სხეული და გონება ერთმანეთსაა მიჯაჭვული. ფიზიკური ვარჯიში სისხლის მიმოქცევას აუმჯობესებს,  რაც თავის მხრივ ტვინისთვის მეტი ჟანგბადის მიწოდების საწინდარია. ამგვარად ტვინი უკეთესად ფუნქციონირებს, ეს კი ზუსტად ის არის, რაც საგამოცდო პერიოდში გჭირდებათ. გარდა ამისა რეგურალურ ფიზიკურ ვარჯიშებს შფოთვის დამარცხება და ადამიანის თვითშეფასების ამაღლება შეუძლიათ. სუფთა ჰაერზე გასაეირნების შემდეგ სამუშაო მაგიდასთან კონცენტრაციაც არ გაგიჭირდებათ.

იძინეთ

გამოცდის წინა ღამეს თქვენ კარგად უნდა გამოიძინოთ. თუმცა ეს წესი მთელ წინასაგამოცდო პერიოდს ეხება. თავის დროზე დაძინების შედეგად თქვენ დილით ადრე გაღვიძებას და დღის გეგმის შესრულებას ყოველგვარი გართულების გარეშე შეძლებთ. ღამეებს მეცადინეობაში ნუ გაათენებთ, ასე თქვენ დასვენების შესაძლებლობას დაკარგავთ. ხანდახან გვიან მეცადინეობა გარდაუვალია. თუმცა შეეცადეთ ასეთი შემთხვევები მინიმუმამდე დაიყვანოთ, დაიძინეთ თავის დროზე და სხვადასხვა გაჯეტებს ღამით ნუ გაეკარებით.

შეინარჩუნეთ სიმშვიდე და პოზიტიურად განეწყვეთ

ახლა თქვენ წამყვანი ფსიქოლოგების, ნეირობიოლოგებისა და საგანმანათლებლო სფეროს სპეციალისტების უამრავი რჩევა გაქვთ. ისინი თქვენ უკეთესად სწავლაში დაგეხმრებათ. თითოეული მათგანი მაქსიმალურად გამოიყენეთ! ბოლოსდაბოლოს თქვენ, წინა თაობის სტუდენტებთან შედარებით, მეხსიერების, ხასიათისა და კონცენტრაციის გასაუმჯობესებელი ბევრად მეტი ხერხი გაქვთ. ასე რომ სიმშვიდე და პოზიტიური განწყობა მთელი წინასაგამოცდო პერიოდის განმავლობაში უნდა შეინარჩუნოთ. მთავარია მიხვდეთ სწავლის რომელი მეთოდია თქვენთვის ყველაზე ეფექტური და მას მიყვეთ.  და ბოლოს, გამოცდების დასასრულს საკუთარი თავის დაჯილდოვება არ დაგავიწყდეთ!

რჩევების განყოფილება გამოცდებზე გასვლის მსურველთათვის

მოამზადა თეა ინაშვილმა

წყარო: BBC

განათლების, მეცნიერების, კულტურის და სპორტის მინისტრის მოადგილე, ირინა აბულაძის განცხადებით, პროფესიული განათლების სფეროში, აქამდე არ არსებობდა მასწავლებლების გადამზადების სისტემა, რაც მალე შეიცვლება. მისივე თქმით, ცვლილებები შეეხება პროფესიული სასწავლებლების პედაგოგების ანაზღაურებასაც და ის გარკვეულ შედეგებზე იქნება დამოკიდებული. ამის შესახებ მინისტრის მოადგილემ, პროფესიულ-ტექნიკური განათლების და ტრენინგის განვითარების შესახებ ახალი პროექტის პრეზენტაციის დროს ისაუბრა. პროექტი გაერთიანებული სამეფოს „კარგი მმართველობის ფონდის“ მიერ 1,8 მილიონი ფუნტი სტერლინგით ფინანსდება და მას მსოფლიო ბანკი, განათლების, მეცნიერების, კულტურისა და სპორტის სამინისტროსთან თანამშრომლობით განახორციელებს.

„მიუხედავად იმ ძალიან სწრაფი ნაბიჯებისა, რაც სახელმწიფომ გადადგა პროფესიული განათლების განვითარების მიმართულებით, ჩვენ კიდევ ერთხელ დავინახეთ, რომ შევფერხდით და თუ სადმე რამე ვერ გაკეთდა, ეს სწორედ ადამიანური კაპიტალის გამო ვერ მოხდა. მასწავლებელი არის საკვანძო ფიგურა და ასევე ხელმძღვანელი ამ ორგანიზაციების. მასწავლებლებთან დაკავშირებით გამოწვევებით სავსეა პროფესიული განათლების სისტემა, თუ სკოლის სივრცეში ჩვენ გვაქვს ეროვნული სასწავლო გეგმა და ასე თუ ისე განსაზღვრული გვაქვს მოსწავლეების მისაღწევი შედეგები, პროფესიულის შემთხვევაში, სირთულე იმიტომაა, რომ ძალიან სპეციფიკურია და სფეროები ერთმანეთისგან ძალიან განსხვავდება. პრაქტიკულად პროფესიული განათლების სფეროს არ ჰქონია სისტემა, სადაც მოამზადებდნენ პროფესიული სასწავლებლის მასწავლებლებს, ზოგადი განათლების სფეროში ეს მაინც გვქონდა.

„სრულიად გაურკვეველია, პრაქტიკულად ვინ ასწავლის დღეს კოლეჯში, ასე რომ, ძალიან კარგად გასაანალიზებელია როგორი მასწავლებელი გვჭირდება ჩვენ იმ პროგრამებისთვის და იმ შედეგებისთვის, რა მიზნებიც გვაქვს. როგორი ბალანსი უნდა დავიცვათ თეორიულ და პრაქტიკულ მასწავლებელს და სწავლებას შორის. ერთია გქონდეს პროგრამა, მეორეა – გყავდეს კარგი მასწავლებელი, რომელიც მას მსმენელამდე მიიტანს. ჩვენ აქცენტი გვაქვს პრაქტიკული უნარების განვითარებაზე, გადავდივართ მოდულურ სწავლებაზე, რომელიც მაქსიმალურად უნარებზე და კომპეტენციებზეა დაფუძნებული და ნაკლებად საგნობრივ და ვიწრო დისციპლინის ჭრილში“, – განაცხადა მინისტრის მოადგილემ.

მისივე თქმით, უნდა შემუშავდეს პროფესიული განვითარების ისეთი სქემა, რომელიც სისტემაში ახალი კადრების შემოსვლას შეუწყობს ხელს.

„ჩვენ უნდა მოვახდინოთ ახალი კადრების შემოსვლა პროფესიაში, მოვახდინოთ ბიზნესის და კერძო სექტორის ჩართულობის და მათ ბაზაზე სწავლების სტიმულირება. ამისთვის ჩვენ დაგვჭირდება პროფესიული განვითარების ისეთი სქემა, რომელიც ერთის მხრივ მოიზიდავს ასეთ კადრებს და მეორეს მხრივ შეუნარჩუნებს მათ ღირსეულ ანაზღაურებას, ამიტომ სახელფასო ზრდა ცხადია მოჰყვება ამ პოლიტიკას, რასაც სამინისტრო განსაზღვრავს.მოგეხსენებათ, ჩვენ უკვე პირველი ეტაპზე ვახორციელებთ მცირეოდენ, 30%-იანი სახელფასო მატებას. ჩვენ ზუსტად უნდა ვიცოდეთ და ვხედავდეთ ესა თუ ის მასწავლებელი რა შედეგზე გაიყვანს და უნდა გაიყვანოს მოსწავლე, ამიტომ სახელფასო ზრდა არის ჩვენი პრიორიტეტი, თუმცა ეს უნდა იყოს მიბმული შედეგებთან,“ – აღნიშნა ირინა აბულაძემ.

პროფესიული სასწავლებლების პედაგოგთა ხელფასის ზრდა მათთვის შექმნილი მასწავლებელთა სქემით განხორციელდება

მოამზადა თამთა ვირსალაძემ

საქართველოს მთავრობის დადგენილებითა და პრემიერ მამუკა ბახტაძის ხელმოწერით დამტკიცდა მასწავლებლის პროფესიული განვითარებისა და კარიერული წინსვლის ახალი სქემა.

მასწავლებლის სახლის განმარტებით, ეს არის ცვლილებები, რომელიც შედის სქემაში მის მილევამდე და რეგულაციის წესის ამოქმედებამდე.

EDU.ARIS.GE დოკუმენტს უცვლელად გთავაზობთ:

მასწავლებლის პროფესიული განვითარებისა და კარიერული წინსვლის სქემა

დოკუმენტი საკანონმდებლო მაცნეზე გამოქვეყნდა.

„უმაღლესი და პროფესიული განათლების დამადასტურებელი სახელმწიფო დოკუმენტების – დიპლომისა და პროფესიული დიპლომის დამტკიცების შესახებ“ ბრძანებაში ცვლილებები შევიდა.

ბრძანების სათაური შემდეგი რედაქციით ჩამოყალიბდა: „უმაღლესი განათლების დამადასტურებელი სახელმწიფო დოკუმენტის – დიპლომის ფორმის დამტკიცების შესახებ“.

როგორც ბრძანების დანართში ვკითხულობთ, იმ პირებისთვის, რომლებმაც განათლება ოკუპუირებულ ტერიტორიაზე მიიღეს და ვერ ახერხებენ თავინთი განათლების დადასტურებას, დიპლომის ან მისი დუბლიკატის გაცემის საფასური 50 ლარით განისაზღვრა. იგივე რაოდენობის თანხა ექნებათ გადასახდელი საერთაშორისო დაცვის მქონე და საქართველოს ოკუპირებული ტერიტორიებიდან იძულებით გადაადგილებულ პირებსაც.

„ოკუპირებულ ტერიტორიაზე მიღებული უმაღლესი განათლების, ლიცენზირებულ უმაღლეს საგანმანათლებლო დაწესებულებაში ჩარიცხული პირების მიერ მიღებული უმაღლესი განათლების, ლიკვიდირებულ ან საგანმანათლებლო საქმიანობაშეწყვეტილ დაწესებულებაში განათლებამიღებული იმ პირების, რომლებიც ვერ ახერხებენ თავიანთი განათლების ან კვალიფიკაციის დადასტურებას, აგრეთვე საერთაშორისო დაცვის მქონე პირებისა და საქართველოს ოკუპირებული ტერიტორიებიდან იძულებით გადაადგილებული პირების – დევნილების მიერ მიღებული უმაღლესი განათლების აღიარების დამადასტურებელი დოკუმენტის – დიპლომის ან მისი დუბლიკატის გაცემის საფასურია 50 (ორმოცდაათი) ლარი”, – ვკითხულობთ ბრძანების დანდართში.

რაც შეეხება საფასურის გადახდისა და გადახდილი საფასურის დაბრუნების წესს, ეს პროცედურა შემდეგნაირად არის განსაზღვრული:

საფასურის გადახდისა და გადახდილი საფასურის დაბრუნების წესი:

1. საფასური გადაიხდება წინასწარ, შესაბამისი მომსახურების გაწევამდე, უნაღდო ანგარიშსწორებით ცენტრის ანგარიშსწორების ანგარიშზე შეტანის გზით.

2. ცენტრის მიერ გაწეული მომსახურებისათვის გადახდილი საფასური სრულად ბრუნდება, თუ დაინტერესებული პირი შესაბამისი მომსახურების შესახებ განცხადების რეგისტრაციამდე უარს აცხადებს მომსახურებაზე.

3. თუ მომსახურების გაწევისას ცენტრმა დაუშვა შეცდომა, კერძოდ, დოკუმენტი გაცემულ იქნა არასწორი მონაცემებით, დაინტერესებულ პირს ხელახლა გაეწევა მომსახურება დამატებითი საფასურის გადახდის გარეშე. ასეთ შემთხვევაში, თუ დაინტერესებული პირი უარს განაცხადებს მომსახურების ხელახლა მიღებაზე, მას უბრუნდება გადახდილი საფასური.

4. თუ საფასური გადახდილია ამ წესით დადგენილ განაკვეთზე მეტი ოდენობით, საფასურის გადამხდელს უბრუნდება სხვაობა მის მიერ გადახდილ თანხასა და ამ კანონით დადგენილ განაკვეთს შორის.

5. ამ მუხლით დადგენილი წესით საფასური ბრუნდება დაინტერესებული პირის წერილობითი მოთხოვნიდან 10 სამუშაო დღის ვადაში. მოთხოვნა უნდა შეიცავდეს გადახდილი საფასურის ნაწილობრივ ან სრულად დაბრუნების კანონიერი საფუძვლის არსებობის დასაბუთებას. მოთხოვნა წარდგენილი უნდა იქნეს საფასურის გადახდიდან 3 თვის ვადაში. ამ ვადის გასვლის შემდეგ გადახდილი საფასური არ ბრუნდება. ამ ვადის გაგრძელება ან გაშვებული ვადის აღდგენა დაუშვებელია.

ბრძანებას ხელს აწერს განათლების, მეცნიერების, კულტურისა და სპორტის მინისტრი მიხეილ ბატიაშვილი.

მოამზადა ანუკი წიწილაშვილმა

მთავრობამ დაამტკიცა მასწავლებელთა პროფესიული განვითარებისა და კარიერული წინსვლის სქემის განახლებული დოკუმენტი. მასწავლებლის სახლის განმარტებით, ეს არის ცვლილებები, რომელიც შედის სქემაში მის მილევამდე და რეგულაციის წესის ამოქმედებამდე.

EDU.ARIS.GE წარმოგიდგენთ სხვადასხვა სტატუსის მქონე მასწავლებლის დაწინაურების პრინციპს:

მასწავლებლის სტატუსების მისანიჭებლად აუცილებელი გზები და საშუალებები

ყოველი მომდევნო სტატუსის მისაღწევად მასწავლებელმა უნდა გაიაროს პროფესიული განვითარების თანმიმდევრული გზა. თითოეული სტატუსის მინიჭებისთვის საჭირო კრედიტქულებს მასწავლებელი აგროვებს მომდევნო სტატუსის მინიჭებამდე.

პრაქტიკოსი მასწავლებელი:

ახორციელებს თვითშეფასებას თვითშეფასების კითხვარის გამოყენებით;

თვითშეფასების კითხვარის ანალიზის საფუძველზე, გამოკვეთს პროფესიულ საჭიროებებს და ადგენს პროფესიული განვითარების ინდივიდუალურ გეგმას;

ყოველი წლის ბოლოს მასწავლებლის შეფასების ჯგუფს წარუდგენს პროფესიული განვითარების ინდივიდუალური გეგმის შესრულების პრეზენტაციას და მასწავლებლის პროფესიულ საქაღალდეში განათავსებს მის მიერ განხორციელებული აქტივობების დამადასტურებელ დოკუმენტებს.

პრაქტიკოსმა მასწავლებელმა უფროსი მასწავლებლის სტატუსის მისანიჭებლად შეიძლება აირჩიოს ერთ-ერთი შემდეგი გზა:

I გზა:

უფროსი მასწავლებლის სტატუსის მისანიჭებლად პრაქტიკოსი მასწავლებელი აგროვებს 19 კრედიტქულას, რომელთაგან 4 კრედიტქულა უნდა მოიცავდეს მასწავლებლის შეფასების ჯგუფის მიერ პრაქტიკოსი მასწავლებლის ჩატარებული ორი გაკვეთილის შეფასებას (თითოეული – 2 კრედიტქულა), ხოლო 15 კრედიტქულა – საგნობრივი და პროფესიული კომპეტენციების დადასტურებას.

პრაქტიკოსი მასწავლებელი ვალდებულია დაადასტუროს საგნობრივი და პროფესიული კომპეტენციები.

იმ შემთხვევაში, თუ პრაქტიკოსი მასწავლებელი საგნობრივი და პროფესიული კომპეტენციების დადასტურებისას სრულად ვერ დააგროვებს 15 კრედიტქულას, მას შესაძლებლობა ეძლევა უფროსი მასწავლებლის სტატუსის მისანიჭებლად საჭირო კრედიტქულები შეავსოს შესაბამისი მიმართულების აქტივობებით – №2 ცხრილიდან.

პრაქტიკოსი მასწავლებელი სტატუსის შესაბამის კრედიტქულებს აგროვებს საჭიროებებზე დაფუძნებით.

პრაქტიკოსი მასწავლებლის მიერ საგნობრივი და პროფესიული კომპეტენციის ყოველი შემდგომი დადასტურება აუქმებს პრაქტიკოსი მასწავლებლის მიერ იმავე საგანში საგნობრივი და პროფესიული კომპეტენციის დადასტურებისას მიღებულ შეფასებას და შესაბამის კრედიტქულებს.

საგნობრივი და პროფესიული კომპეტენციების დადასტურებისას კრედიტქულების დაგროვების პრინციპი მოცემულია №1 ცხრილში:

პრაქტიკოსი მასწავლებლის მიერ განსახორციელებელი დამატებითი აქტივობების/საქმიანობების ჩამონათვალი, რომელიც მას კრედიტქულების დაგროვებაში დაეხმარება, მოცემულია №2 ცხრილში:

რეკომენდებულია მასწავლებელმა კრედიტქულები დააგროვოს მრავალფეროვანი აქტივობების განხორციელებით. კრედიტქულების მისანიჭებლად მასწავლებლის შეფასების ჯგუფი ეფუძნება შეფასების სტანდარტიზებულ ინსტრუმენტს.

მასწავლებლის შეფასების ჯგუფი აფასებს პრაქტიკოსი მასწავლებლის მიერ განხორციელებულ აქტივობებს და მასწავლებლის პროფესიულ საქაღალდეში არსებული დოკუმენტების შეფასების საფუძველზე იღებს გადაწყვეტილებას პრაქტიკოსი მასწავლებლისათვის უფროსი მასწავლებლის სტატუსის მინიჭების შესახებ წინადადების მასწავლებელთა პროფესიული განვითარების ეროვნული ცენტრისათვის წარდგენის შესახებ.

II გზა:

პრაქტიკოს მასწავლებელს მიენიჭება უფროსი მასწავლებლის სტატუსი, თუ საგნობრივი და პროფესიული კომპეტენციების დადასტურებისას, თითოეულ მათგანში დააგროვებს 10 კრედიტქულას.

III გზა:

პრაქტიკოს მასწავლებელს მიენიჭება უფროსი მასწავლებლის სტატუსი იმ შემთხვევაში, თუ სქემის ძალაში შესვლის შემდგომ:

ა) მოიპოვებს დოქტორის ან მასთან გათანაბრებულ აკადემიურ ხარისხს განათლების მეცნიერებების მიმართულებით, ან იმ დარგში/სპეციალობაში, რომლის შესაბამის საგანსაც ასწავლის ზოგადსაგანმანათლებლო დაწესებულებაში;

ბ) მასწავლებლის მომზადების საგანმანათლებლო პროგრამის დასრულების შედეგად მიიღებს მასწავლებლის მომზადების სერტიფიკატს.

მასწავლებლის შეფასების ჯგუფი მინიჭებული აკადემიური ხარისხის/სერტიფიკატის საფუძველზე იღებს გადაწყვეტილებას პრაქტიკოსი მასწავლებლისთვის უფროსი მასწავლებლის სტატუსის მინიჭების შესახებ წინადადების მასწავლებელთა პროფესიული განვითარების ეროვნული ცენტრისთვის წარდგენის შესახებ.

უფროსი მასწავლებელი:

ახორციელებს თვითშეფასებას თვითშეფასების კითხვარის გამოყენებით;

თვითშეფასების კითხვარის ანალიზის საფუძველზე გამოკვეთს პროფესიულ საჭიროებებს და ადგენს პროფესიული განვითარების ინდივიდუალურ გეგმას;

ყოველი წლის ბოლოს მასწავლებლის შეფასების ჯგუფს წარუდგენს პროფესიული განვითარების ინდივიდუალური გეგმის შესრულების პრეზენტაციას;

მასწავლებლის პროფესიულ საქაღალდეში განათავსებს მის მიერ განხორციელებული აქტივობების დამადასტურებელ დოკუმენტებს.

უფროსმა მასწავლებელმა წამყვანი მასწავლებლის სტატუსის მისანიჭებლად შეიძლება აირჩიოს ერთ-ერთი შემდეგი გზა:

I გზა:

წამყვანი მასწავლებლის სტატუსის მისანიჭებლად უფროსი მასწავლებელი ვალდებულია დააგროვოს 19 კრედიტქულა. წამყვანი მასწავლებლის სტატუსის მისანიჭებლად უფროსი მასწავლებელი:

ა) ახორციელებს პედაგოგიური პრაქტიკის კვლევას და კვლევის შედეგებს უზიარებს კოლეგებს (2 კრედიტქულა);

ბ) გადის გარე დაკვირვებას (4 კრედიტქულა);

გ) ატარებს 2 სამოდელო გაკვეთილს (თითოეული 1 კრედიტქულა);

დ) ახორციელებს დამატებით საქმიანობებს/აქტივობებს (იხ. ცხრილი №3) (11 კრედიტქულა).

წამყვანი მასწავლებლის სტატუსის მისანიჭებლად უფროსი მასწავლებელი სტატუსის შესაბამის კრედიტქულებს აგროვებს საჭიროებებზე დაფუძნებით.

მასწავლებლის შეფასების ჯგუფი აფასებს უფროსი მასწავლებლის მიერ განხორციელებულ საქმიანობებს და მასწავლებლის პროფესიულ საქაღალდეში არსებული დოკუმენტების შეფასების საფუძველზე იღებს გადაწყვეტილებას უფროსი მასწავლებლისთვის წამყვანი მასწავლებლის სტატუსის მინიჭების შესახებ წინადადების მასწავლებელთა პროფესიული განვითარების ეროვნული ცენტრისთვის წარდგენის შესახებ.

II გზა:

უფროს მასწავლებელს, რომელიც სქემის ძალაში შესვლის შემდგომ, განათლების მიმართულებით, ან იმ დარგში/სპეციალობაში, რომლის შესაბამის საგანსაც ასწავლის ზოგადსაგანმანათლებლო დაწესებულებაში შესაბამისი სასწავლო წლის განმავლობაში, დოქტორის ან მასთან გათანაბრებული აკადემიური ხარისხის მინიჭების შემთხვევაში, მიენიჭება წამყვანი მასწავლებლის სტატუსი.

მასწავლებლის შეფასების ჯგუფი მინიჭებული აკადემიური ხარისხის საფუძველზე იღებს გადაწყვეტილებას უფროსი მასწავლებლისთვის წამყვანი მასწავლებლის სტატუსის მინიჭების შესახებ წინდადების მასწავლებელთა პროფესიული განვთარების ეროვნული ცენტრისთვის წარდგენის შესახებ.

III გზა:

გარე დაკვირვების წარმატებით გავლის შემთხვევაში წამყვანი მასწავლებლის სტატუსი მიენიჭება:

ა) უფროს მასწავლებელს, რომელსაც სქემაში განაწილების დროისთვის მინიჭებული ჰქონდა დოქტორის ან მასთან გათანაბრებული აკადემიური ხარისხი განათლების მეცნიერებების მიმართულებით, ან იმ დარგში/სპეციალობაში, რომლის შესაბამის საგანსაც ასწავლის ზოგადსაგანმანათლებლო დაწესებულებაში;

ბ) უფროს მასწავლებელს, რომელსაც უფროსი მასწავლებლის სტატუსი მინიჭებული აქვს დოქტორის ან მასთან გათანაბრებული აკადემიური ხარისხის მოპოვების შედეგად განათლების მეცნიერებების მიმართულებით ან იმ დარგში/სპეციალობაში, რომლის შესაბამის საგანსაც ასწავლის ზოგადსაგანმანათლებლო დაწესებულებაში.

წამყვანი მასწავლებელი:

ახორციელებს თვითშეფასებას თვითშეფასების კითხვარის გამოყენებით;

თვითშეფასების კითხვარის ანალიზის საფუძველზე გამოკვეთს პროფესიულ საჭიროებებს და ადგენს პროფესიული განვითარების ინდივიდუალურ გეგმას;

ყოველი წლის ბოლოს მასწავლებლის შეფასების ჯგუფს წარუდგენს პროფესიული განვითარების ინდივიდუალური გეგმის შესრულების პრეზენტაციას;

მასწავლებლის პროფესიულ საქაღალდეში განათავსებს პროფესიული განვითარებისთვის მის მიერ განხორციელებული აქტივობების დამადასტურებელ დოკუმენტებს.

წამყვანი მასწავლებელი მენტორის სტატუსის მისანიჭებლად ვალდებულია დააგროვოს 25 კრედიტქულა. მენტორის სტატუსის მისანიჭებლად წამყვანი მასწავლებელი:

ა) ატარებს არანაკლებ 4 სამოდელო გაკვეთილს (თითოეული 1 კრედიტქულა);

ბ) ახორციელებს ზოგადსაგანმანათლებლო დაწესებულების საჭიროებების კვლევასა და კვლევის შედეგების საფუძველზე ატარებს სამუშაო შეხვედრას კოლეგებისთვის გამოცდილების გაზიარების მიზნით (3 კრედიტქულა);

გ) ქმნის სასწავლო რესურსს (1 კრედიტქულა) ან/და რეცენზირებულ პროფესიულ ლიტერატურას – სტატიას (1 კრედიტქულა) ან/და მეთოდურ ლიტერატურას (2 კრედიტქულა). ამ მიმართულებით მასწავლებელმა უნდა დააგროვოს ჯამში არანაკლებ 2 კრედიტქულა;

დ) ახორციელებს დამატებით საქმიანობებს/აქტივობებს (იხ. ცხრილი №3) (16 კრედიტქულა).

მენტორის სტატუსის მისანიჭებლად წამყვანი მასწავლებელი სტატუსის შესაბამის კრედიტქულებს აგროვებს საჭიროებებზე დაფუძნებით.

წამყვანი მასწავლებელი მასწავლებლის პროფესიულ საქაღალდეში განათავსებს პროფესიული განვითარებისთვის მის მიერ განხორციელებული აქტივობების დამადასტურებელ დოკუმენტებს.

მასწავლებლის შეფასების ჯგუფი აფასებს წამყვანი მასწავლებლის მიერ განხორციელებულ საქმიანობებს და მასწავლებლის პროფესიულ საქაღალდეში არსებული დოკუმენტების შეფასების საფუძველზე იღებს გადაწყვეტილებას წამყვანი მასწავლებლისთვის მენტორის სტატუსის მინიჭების შესახებ წინადადების მასწავლებელთა პროფესიული განვითარების ეროვნული ცენტრისთვის წარდგენის შესახებ.

მენტორის ფუნქცია-მოვალეობები მიმართულია სასწავლო პროცესის ხარისხის გაუმჯობესებაზე და კათედრის/სკოლის განვითარებაზე და მას სტატუსი უნარჩუნდება უვადოდ.

უფროსი და წამყვანი მასწავლებლის დამატებითი საქმიანობების/აქტივობების ჩამონათვალი, რომელიც მას კრედიტქულების დაგროვებაში დაეხმარება:

უფროსი და წამყვანი მასწავლებელი დამატებით კრედიტქულებს აგროვებენ სასწავლო პროცესთან დაკავშირებული მრავალფეროვანი აქტივობებით, რომლებიც გამომდინარეობს როგორც მოსწავლეთა, ასევე საკუთარი, კოლეგების და ზოგადსაგანმანათლებლო დაწესებულების საჭიროებებიდან. ცხრილი ნომერი 3. (ორ ნაწილად)

ნაწილი2

კრედიტქულების მისანიჭებლად მასწავლებლის შეფასების ჯგუფი ეფუძნება შეფასების სტანდარტიზებულ ინსტრუმენტს.

მასწავლებელი ცხრილ №3-ით გათვალისწინებული მასწავლებლის მიერ ინიცირებული სხვა დამატებითი საქმიანობის განსახორციელებლად მიმართავს მასწავლებლის შეფასების ჯგუფს, რომელიც მასწავლებელთა პროფესიული განვითარების ეროვნულ ცენტრთან შეთანხმებით შეიმუშავებს შესაბამისი დამატებითი საქმიანობის დამადასტურებელ დოკუმენტაციას, შეფასების კრიტერიუმებს და განსაზღვრავს მისანიჭებელი კრედიტქულების რაოდენობას.

სტატუსის მინიჭების განსაკუთრებული შემთხვევა

განსაკუთრებული პედაგოგიური გამოცდილების და მიღწევების მქონე ღვაწლმოსილ მასწავლებელს ან/და ზოგად განათლებაში განსაკუთრებული დამსახურების მქონე მასწავლებელს საქართველოს განათლების, მეცნიერების, კულტურისა და სპორტის მინისტრის ინდივიდუალური ადმინისტრაციულ-სამართლებრივი აქტით შეიძლება მიენიჭოს სქემით განსაზღვრული ერთ-ერთი სტატუსი. საქართველოს განათლების, მეცნიერების, კულტურისა და სპორტის მინისტრის ინდივიდუალური ადმინისტრაციულ-სამართლებრივი აქტი განსაკუთრებული პედაგოგიური გამოცდილების და მიღწევების მქონე ღვაწლმოსილი მასწავლებლისთვის სქემით განსაზღვრული სტატუსის მინიჭების შესახებ, ეგზავნება განათლების მართვის საინფორმაციო სისტემას, რომელიც თავის მხრივ, აღნიშნულ ინფორმაციას ასახავს ელექტრონულ სისტემაში.

საქართველოს განათლების, მეცნიერების, კულტურისა და სპორტის მინისტრი ინდივიდუალური ადმინისტრაციულ-სამართლებრივი აქტით ქმნის კომისიას, რომელიც შეიმუშავებს და ამტკიცებს განსაკუთრებული პედაგოგიური გამოცდილების და მიღწევების მქონე ღვაწლმოსილი მასწავლებლისათვის ან/და ზოგად განათლებაში განსაკუთრებული დამსახურების მქონე მასწავლებლისათვის სქემით განსაზღვრული ერთ-ერთი სტატუსის მინიჭების წესსა და პირობებს.

მთავრობამ მასწავლებლის პროფესიული განვითარებისა და კარიერული წინსვლის ახალი სქემა დაამტკიცა – დოკუმენტი