ეროვნულ თავდაცვის აკადემიაში რიგით მეორე საერთაშორისო კვირეული ოფიციალურად გაიხსნა. კვირეულში იუნკერებთან ერთად, ამერიკის, საფრანგეთის, გერმანიის, ჩეხეთის, ლიტვის, ლატვიის, აზერბაიჯანისა და თურქეთის უმაღლესი სამხედრო სასწავლებლების მსმენელები მონაწილეობენ.

საერთაშორისო კვირეული გენერალური შტაბის უფროსმა, გენერალ-მაიორმა ვახტანგ კაპანაძემ, თავდაცვის მინისტრის მოადგილემ, ანა დოლიძემ და ეროვნული თავდაცვის აკადემიის რექტორის მოვალეობის შემსრულებელმა, ვიცე-პოლკოვნიკმა ვასილ კოპეიკინმა გახსნეს.

საერთაშორისო კვირეულის მიზანი აკადემიის ცნობადობის ამაღლება და პოპულარიზაციაა.

კვირეულის ფარგლებში მონაწილეებისთვის დაგეგმილია სხვადასხვა სახის აკადემიური და კულტურულ-შემეცნებითი ღონისძიებები.

ეროვნულ თავდაცვის აკადემიაში საერთაშორისო კვირეული ყოველწლიურად ტარდება. ღონისძიება 21 მარტს გაიხსნა და 25 მარტს დასრულდება.

24 მარტს, 19:00 საათზე, ილიას სახელმწიფო უნივერსიტეტის წიგნის სახლში ”ლიგამუსი“ ილიაუნის ლიტერატურული კლუბი და ”ქარჩხაძის გამომცემლობა“ გიწვევთ ახალი სერიის – “ქართული ალტერნატიული პროზა” – და მისი პირველი წიგნის პრეზენტაციაზე. წიგნს – სახელწოდებით, ”გურამ რჩეულიშვილი“ წარადგენენ ლიტერატურათმცოდნე თამაზ ვასაძე და ლიტერატურის კრიტიკოსი ლევან ბრეგაძე.

ნაწყვეტი წიგნის ბოლოსიტყვაობიდან:

”გურამ რჩეულიშვილი გამორჩეული მოვლენაა თანამედროვე ქართულ ლიტერატურაში. მწერალს მხოლოდ ხუთი წელი ჰქონდა იმისთვის, რომ საქართველოში ახალი ლიტერატურული ეპოქისთვის დაედო საფუძველი. არცთუ მეგობრულად მიღებული საბჭოთა კრიტიკის მიერ, 22 წლის ახალგაზრდა დებიუტანტი მაშინვე მოექცა პროგრესული ახალგაზრდების ყურადღების ცენტრში, და მას მერე ყველა თაობა თავად ხდება ამ საოცარი, ლაკონური, დამუხტული და მუდამ თანამედროვე ტექსტების ხელახლა აღმომჩენი“.

დასწრება თავისუფალია.

21 მარტს, აკაკი წერეთლის სახელმწიფო უნივერსიტეტში ქართული ჟურნალისტიკის დღე აღინიშნა.

ბიზნესის, სამართლისა და სოციალურ მეცნიერებათა ფაკულტეტის, სოციალურ მეცნიერებათა დეპარტამენტის, ჟურნალისტიკის მიმართულების ორგანიზებით, უნივერსიტეტის ადმინისტრაციული კორპუსის ფოიეში მოეწყო ფოტოგამოფენა თემაზე: „დედაუნივერსიტეტი“.

ჟურნალისტიკის სპეციალობის სტუდენტთა მიერ გადაღებულ ფოტოებში აისახა ბოლო ორი წლის განმავლობაში უნივერსიტეტში ჟურნალისტიკის მიმართულების მიერ დაგეგმილი და განხორციელებული ღონისძიებები. გამოფენა უნივერსიტეტში ერთი კვირა გასტანს და ნებისმიერ მსურველს შეუძლია მისი დათვალიერება.

ქართული ჟურნალისტიკის დღე საქართველოს ჟურნალისტთა ფედერაციამ და თბილისის სახელმწიფო უნივერსიტეტმა 1993 წელს ერთობლივად დააწესეს. ეს თარიღი პირველი ქართული გაზეთის დაარსებას უკავშირდება, რომელსაც თავდაპირველად „საქართველოს გაზეთი“ შემდეგ კი „ქართული გაზეთი“ ეწოდებოდა.

აკაკი წერეთლის სახელმწიფო უნივერსიტეტი საქართველოში მოღვაწე ყველა მომავალ, დამწყებ თუ უკვე შემდგარ ჟურნალისტს ულოცავს პროფესიულ დღეს!

ილიას სახელმწიფო უნივერსიტეტის სამართლის სკოლის გუნდმა სისხლის სამართლის ადვოკატირების რიგით მეხუთე ეროვნულ შეჯიბრში გაიმარჯვა. სამართლის სკოლის გუნდს წარმოადგენდნენ: თეონა გუჯეჯიანი, ნინო ცარციძე, თორნიკე ხიდეშელი, ელენე ქიშმარია, გიორგი მაზანაშვილი და მარიამ კახაძე. გამარჯვებულ გუნდის მენტორი იყო სამართლის სკოლის მოწვეული ლექტორი ბესიკ ქვარცხავა, რომელიც ამავე სკოლის კურსდამთავრებულია.

ილიაუნის ცნობით, ეროვნული შეჯიბრი, თბილისის თავისუფალი უნივერსიტეტის ბიზნესსამართლის ეროვნული ცენტრის ორგანიზებით, საქართველოს უზენაეს სასამართლოში 19-20 მარტს ჩატარდა პროგრამის – USAID/PROLoG – ფინანსური მხარდაჭერით.

წელს ეროვნული ჩემპიონის ტიტულისათვის ერთმანეთს თბილისის სახელმწიფო უნივერსიტეტის, ილიას სახელმწიფო უნივერსიტეტის, საქართველოს უნივერსიტეტის, კავკასიის უნივერსიტეტის, თავისუფალი უნივერსიტეტის, სულხან-საბა ორბელიანისა და საზოგადოებრივ საქმეთა ინსტიტუტის გუნდები დაუპირისპირდნენ. შეჯიბრში მსაჯების როლს თბილისის საქალაქო სასამართლოს მოსამართლეები, საქართველოს მთავარი პროკურატურის წარმომადგენლები და ადვოკატები ასრულებდნენ.

ფინალში ერთმანეთს ილიას სახელმწიფო უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის გუნდები დაუპირისპირდნენ. ფინალს თბილისის საქალაქო სასამართლოს მოსამართლე ნინო სანდოძე და უცხოელი ექსპერტები, სტივენ ოსტერმილერი და ქეთრინ სმიტი სჯიდნენ.

ფინალისტები ეროვნული თასით და სერტიფიკატებით დაჯილდოვდნენ.

განათლებისა და მეცნიერების მინისტრის თამარ სანიკიძის ინფორმაციით, აკადემიურმა  საბჭომ,  ვლადიმერ პაპავას იმპიჩმენტის პროცედურის საკითხის განხილვა დაიწყო.  როგორც თამარ სანიკიძე აცხადებს, უნივერსიტეტის აკადემიურ საბჭოზე  საჭიროა, არა მხოლოდ რექტორის ვადაზე ადრე გათავისუფლების არამედ, უნივერსიტეტთან დაკავშირებული ბევრი სხვა საკითხების განხილვა.  განათლების უწყების ხელმძღვანელი რამდენიმე დღის წინ, უნივერსიტეტის ირგვლივ განვითარებულ პროცესებს გვახსენებს და ამბობს, რომ თსუ-ში განვითარებული მოვლენების ფონზე, მცირე დეტალიც კი, კითხვის ნიშნის ქვეშ და ყურადღების მიღმა არ უნდა დარჩეს.

განათლების მინისტრი მიესალმება ფაქტს, რომ რექტორის იმპიჩმენტის საკითხის განხილვის გადაწყვეტილება, სწორედ უნივერსიტეტის აკადემიურმა საბჭომ აიღო საკუთარ თავზე და ვლადიმერ პაპავას იმპიჩმენტის საკითხზეც გადაწყვეტილები მიღებას აკადემიურ საბჭოს აკისრებს.

„უნდა დადგეს თუ არა რექტორის იმპიჩმენტის საკითხი, ეს უნდა გადაწყვიტოს აკადემიურმა საბჭომ. ძალიან კარგია,  რომ საბჭომ ეს პასუხისმგებლობა აიღო, ახალგაზრდებს ჩამოხსნა ეს პასუხისმგებლობა  და თვითონ უნდა განახორციელოს,  იმიტომ რომ ეს არის სწორი. აკადემიური საბჭო არის ის მმართველი ორგანო, რომელსაც აქვს  ვალდებულება, რომ  ნებისმიერ შემთხვევაში, რექტორის მიერ, კანონდარღვევა თუ გადაცდომა განიხილოს.  ეს არ უნდა იყოს სტუდენტების და ახალგაზრდების გასარჩევი საკითხი და უფრო მეტიც, მათი დაპირისპირების  მიზეზი.

კარგია, რომ  საბჭომ ეს პასუხისმგებლობა აიღო და ამ საკითებს განიხილავს. არ დაგვავიწყდეს,  რამდენიმე დღის წინ, როგორი ცუდი მდგომარეობა გვქონდა უნივერსიტეტში,  ეს ნამდვილად, მიუღებელი იყო სახელმწიფოსთვისა და  უნივერსიტეტისთვის.  მიუღებელია  არა იმიტომ, რომ სტუდენტმა ამოიღო ხმა – პირიქით, მიუღებელია ის,  თუ როგორ განვითარდა მოვლენები.

ამიტომ პროცესები  ნელ-ნელა სამართლებრივ ჭრილში – აკადემიური საბჭოს განხილვის რეჟიმში უნდა გადავიდეს და ძალიან დიდი იმედი გვაქვს და ჩვენი მხიდანაც არის მოლოდინი, რომ საბჭო  რაციონალურ გადაწყვეტილებას მიიღებს.

ყოველი შემთხვევისთვის,  რაც საბჭომ უნდა უზრუნველყოს არის ის,  რომ ამ დღეების განმავლობაში,  არც ერთი საკითხი არ უნდა დატოვოს მოკვლევის გარეშე.  ეს არის ერთადერთი გზა იმისათვის, რომ ნამდვილად, გამოჩნდეს, იყო თუ არა ეს დარღვევები- სახელმწიფოს მხრიდან იყო, სტუდენტების მხრიდან თუ უნივერსიტეტის მხრიდან. ძირითადად,   ყველაფერს უნდა დაერქვას თავისი სახელი და საზოგადოებისათვის  ყველაფერი ცნობილი უნდა გახდეს.

შესაბამისად, ვიმედოვნებ, რომ აკადემიური საბჭო არც ერთ მტკივნეულ საკითხს გვერდს არ აუვლის და თითოეულს საფუძვლიანად განიხილავს“,-განაცხადა თამარ სანიკიძემ.

რაც შეეხება შეკითხვას, რომ იმ შემთხვევაში, თუ აკადემიურმა საბჭომ ვლადიმერ პაპავას იმპიჩმენტის საკითხი არ განიხილა, სტუდენები პროტესტის უკიდურეს ფორმას – შიმშილობას აანონსებენ, განათლების უწყების ხელმძღვანელი პასუხისმგებლობას ამ შემთხვევაშიც უნივერსიტეტის მმართველ ორგანოს-აკადემიურ საბჭოს აკისრებს.

 „საბჭომ კიდევ ერთელ, უნდა გაითვალისწინოს, თუ რა ხდებოდა და ისიც თუ რა შეიძლება მოხდეს.  ამიტომ, პასუხისმგებლობა,  რომლებიც სტუდენტებმა აიღეს თავიანთ თავზე და გამოთქვეს პრეტენზები,  რის გამოც, ისინი მართლაც წუხდნენ,  ეს ყველაფერი  უნივერსიტეტის მმართველი ორგანოს გადასაწყვეტია. ამიტომ არც ის უნდა დაგვავიწყდეს რა პროცესები მიმდინარეობდა და ალბათ,  პროგნოზიც უნდა გავაკეთოთ, თუ რა შეიძლება მოხდეს“,-განაცხადა თამარ სანიკიძემ.

ამ დრომდე, კვლავ კითხვის ნიშნის ქვეშ არის, დადგება თუ არა თსუ-ის რექტორის ვადაზე ადრე გათავისუფლების საკითხი დღის წესრიგში. აკადემიური საბჭო  უკვე რამდენჯერმე კიდევ ერთხელ შეიკრიბა, თუმცა ოფიციალური ინფორმაციით, განხილვის მთავარი თემა კრიზისიდან გამოსვლის გზების ძიება იყო.

იმპიჩმენტის საკითხის განხილვამდე, საბჭოს წევრები უნივერსიტეტში დაწყებული შიდა მოკვლევის შედეგებს ელოდებიან.

პარალელურად, რექტორის გადაყენების მოთხოვნას არ ცვლის სტუდენტური თვითმმართველობა, რომელმაც აკადემიურ საბჭოს საკუთარი არგუმენტები წერილობით გააცნო და ვლადიმერ პაპავას ე.წ. ოდეერთან დაკავშირებით მორიგი  ბრალდება წაუყენა.

განათლების სამინისტროს შეთავაზება თსუ-ის სტუდენტებს

მოამზადა თამთა ასანიძემ

2016 წლის 25 მარტს, საქართველოს საპატრიარქოს წმიდა ანდრია პირველწოდებულის სახელობის ქართულ უნივერსიტეტში გაიმართება ახალგაზრდა ჰუმანიტართა პირველი ფორუმი

ფორუმის მიზანია ახალგაზრდა ჰუმანიტარებმა ნათლად გააანალიზონ ჰუმანიტართა წინაშე არსებული გამოწვევები, განსაზღვრონ სამომავლო კვლევის საგანი და მიიღონ რჩევები უფროსი თაობის მეცნიერებისგან.

ფორუმის პროგრამით გათვალისწინებულია სამი მოხსენება და მოხსენებების შემდეგ დაგეგმილია დისკუსია. ფორუმზე წარმოდგენილი იქნებიან სტუდენტები სხვადასხვა უმაღლესი სასწავლებლებიდან და რეგიონებიდან. ფორუმს დაესწრებიან პროფესორ-მასწავლებლები და საჯარო და კერძო სკოლების წარმომადგენლები.

ფორუმში მონაწილე სტუდენტებს მოეთხოვებათ:

1. ფორუმის თემატიკასთან დაგავშირებით გამოთქვან საკუთარი მოსაზრებები;
2. ჰქონდეთ ჩამოყალიბებული აზრი ჰუმანიტარულ მეცნიერებების განვითარების პერსპექტივებთან დაკავშირებით;
3. ჩაერთონ დისკუსიაში და მომხსენებლებთან ერთად განიხილონ საკუთარი სამომავლო კვლევის საკითხები.

ფორუმის თემატიკა:

1. ჰუმანიტართა წინაშე არსებული გამოწვევები და სამოქმედო გეგმა;
2. ეთნიკურ ქართველთა განსახლების არეალი და კულტურის ძირითადი მახასიათებლები თურქეთის რესპუბლიკაში;
3. ქართველოლოგიის განვითარება და თანამედროვე გამოწვევები, ჰუმანიტარული მეცნიერებები სკოლებში.

დღის წესრიგი:
12:00 საათზე ფორუმის მონაწილეები დაესწრებიან ავტოკეფალიის აღდგენასთან დაკავშირებულ სამადლობელ პარაკლისს.
13:00 საათზე წმიდა ანდრია პირველწოდებულის სახელობის ქართულ უნივერსიტეტში მუშაობას შეუდგება ახალგაზრდა ჰუმანიტართა ფორუმი.

• I – სექცია
  13:00 – რექტორი, პროფესორი სერგო ვარდოსანიძე, ჰუმანიტართა წინაშე არსებული გამოწვევები და სამოქმედო გეგმა;
  13:15 – პროფესორი როზეტა გუჯეჯიანი, ეთნიკურ ქართველთა განსახლების არეალი და კულტურის ძირითადი მახასიათებლები თურქეთის რესპუბლიკაში;
  13:30 – პროფესორი ტარიელ ფუტკარაძე, ქართველოლოგიის განვითარება და თანამედროვე გამოწვევები, ჰუმანიტარული მეცნიერებები სკოლებში.
• II – სექცია
  13:45 -ყავა, ჩაი
  14:00 – დისკუსია;
  15:00 – ფორუმის დახურვა.

ფორუმზე დასწრება და მონაწილეობა შეუძლია საქართველოს ყველა უმაღლესი სასწავლებლის სტუდენტს, ვისაც სურს მომავალი დაუკავშიროს ჰუმანიტარულ მეცნიერებებს და გაანალიზებული ჰქონდეს რა მიმართულებით სურს მუშაობა.

დამატებითი ინფორმაციისთვის დაგვიკავშირდით:
giorgichubini@gmail.com
595 012077

საქართველოს პრეზიდენტის 2016 წლის 18 მარტის #18/03/04 განკარგულებით გრიგოლ რობაქიძის უნივერსიტეტს, პრეზიდენტის სარეზერვო ფონდიდან, გამოეყო გრანტი, რომელიც მოხმარდება კრიმინოლოგიური ლექსიკონის შედგენა-გამოცემას.

გრიგოლ რობაქიძის უნივერსიტეტის განმარტებით, ლექსიკონს ამზადებს უნივერსიტეტის კრიმინოლოგიის სამეცნიერო-კვლევითი ინსტიტუტი, მისი დირექტორის პროფესორ მალხაზ ბაძაღუას ხელმძღვანელობით.

უნივერსიტეტის ადმინისტრაცია ულოცავს ინსტიტუტს საპატიო ჯილდოს და უსურვებს შემდგომ წარმატებებს.

ჟურნალისტობა „ბრჭყვილა“ პროფესიაა, მაგრამ ძალიან რთული და შრომატევადი! – ასე დაიწყო წამყვანმა ღონისძიება, რომელიც ქუთაისის უნივერსიტეტში 21 მარტს – ქართული ჟურნალისტიკის დღეს გაიმართა.

ღონისძიებაზე თავი მოიყარეს ქალაქის თითქმის ყველა ჟურნალ-გაზეთის, რადიოს, ტელევიზიისა და პრეს-სამსახურების წარმომადგენლებმა.

ქუთაისის უნივერისტეტის ცნობით, შეხვედრა ძალიან საინტერესო, ორიგინალურ ფორმატში წარიმართა და სტუმრებმა დიდი ხალისით მიიღეს მასში მონაწილეობა.

გასართობ-შემეცნებითი პროგრამა ითვალისწინებდა ჟურნალისტებისათვის მიცემული დავალებების, სიმღერისა და ცეკვის კონკურსს, ორიგინალური რეპორტაჟის მომზადებას.
ჟურნალისტებმა მიცემულ დავალებებს შესანიშნავად გაართვეს თავი. მოსამზადებელ ნომრებს შორის პაუზებს კი თავიანთი შემოქმედებით ავსებდნენ უნივერსიტეტის სტუდენტები.
ღონისძიების ფინალი გახლდათ ტრადიციული ტორტი სტუმრებისათვის! ტორტის საზეიმოდ გაჭრას დაემთხვა საჩუქრის გადაცემა წლის საუკეთესო ჟურნალისტისათვის, რომელიც ადგილზე კოლეგების ხმათა უმრავლესობით იქნა გამოვლენილი.

დასასრულს კი ჟურნალისტებმა გულწრფელი მადლობა გადაიხადეს ასეთი ლამაზი, თბილი დახვედრისა და პროფესიული დღის მილოცვისათვის.

დღის რომელ მონაკვეთში ითვისებს მოსწავლე საგნებს ყველაზე უკეთ , როგორ უნდა შევარჩიოთ მოზარდის სამეცადინო კუთხე, როგორ უნდა დავაბალანსოთ დრო სასკოლო ასაკის შვილის მეცადინეობასა და დასვენება-გართობას შორის, რატომ არ არის რეკომენდირებული ჭამა და მეცადინეობა ერთად და ასევე, რატომ არ შეიძლება მეცადინეობა მწოლიარე მდგომარეობაში. Edu.aris.ge – ს ამ თემებზე ექიმი-პედიატრი შალვა ლილუაშვილი ესაუბრა:

ჭამა და სწავლა ერთსა და იმავე დროს შეუთავსებელი საქმეებია

კვების დროს კუჭსა და ნაწლავებში სისხლის მიმოქცევის გაუმჯობესება ხდება, შესაბამისად, თავის ტვინში სისხლის მიმოქცევა სუსტდება დაათვისების უნარი ამ პერიოდში შედარებით ნაკლებია. ეს არის ერთ- ერთი მიზეზი, თუ რატომ არაა რეკომენდირებული ჭამა და მეცადინეობა ერთად. გარდა ამისა, კონცენტრირება უნდა ხდებოდეს ერთ საქმეზე. ადამიანი საერთოდ ერთ საქმეს უნდა აკეთებდეს, იმიტომ რომ თავის ტვინი მხოლოდ ერთ საქმეზე კონცენტრირდებოდეს და შესაბამისად, სისხლის მიმოქცევაც. არაა რეკომენდირებული და არ შეიძლება თან ჭამოს ბავშვმა და თან იკითხოს. ჭამა და მეცადინეობა პრაქტიკულად შეუთავსებელი საქმეებია.

დაუშვებელია დაწოლილი კითხვა

წოლის დროს თვალის გუგის აკომოდაცია, ანუ სხვადასხვა მანძილზე საგნების გარჩევადობის უნარი ირღვევა. თვალის კუთხე არ არის ისეთი, როგორიც უნდა იყოს მეცადინეობის დროს. წოლისას ამ კუთხეს სწორად ვერ შეარჩევ თვალი დაძაბულია, პროცესი კი სრულყოფილი არ არის. ბავშვი როცა მეცადინეობს და ზის, შუქი უნდა ხვდებოდეს მარცხენა, გარკვეული კუთხიდან. წოლის დროს ამ პრინციპებს ყოველთვის ვერ ვიცავთ და ამიტომ არ არის რეკომენდირებული სამედიცინო თვალისაზრისით დაწოლილი კითხვა ან მეცადინეობა. გარდა ამისა, ბავშვი მოღრეცილად წევს და ხერხემალის მდგომარეობა არაა სწორი. ასევე, არასწორად დგას კისრის მალები და არც სისხლის მიმოქცევაა შესაბამისი. ათვისების თვალსაზრისით შეიძლება დიდი განსხვავება არ ჰქონდეს, მაგრამ ბავშვის ფუნქციური მდგომარეობა არასრულყოფილია. თუმცა, თუ იმდენად აქვს თავი და კისერი გადაღრეცილი რომ სისხლის მიმოქცევა  თავის ტვინში არასრულყოფილია, მაშინ შეიძლება იმოქმედოს ათვისებაზეც.

ბავშვის სამეცადინო კუთხეს შუქი მარცხნიდან უნდა ხვდებოდეს

კუთხე, სადაც ბავშვის მაგიდა დგას ზუსტად და გარკვეული დოზირებით უნდა ხვდებოდეს სინათლე. აუცილებლად უნდა იყოს სიწყნარე და სიმშვიდე. მაგიდისა და სკამის ზომა  უნდა შეესაბამებოდეს ბავშვის ასაკს და რა თქმა უნდა, განათება უნდა იყოს ზუსტად ისეთი როგორიც საჭიროა, სინათლე მარცხენა მხრიდან უნდა შემოდიოდეს.

აუცილებელია მეცადინეობისა და დასვენების დოზირებული რეჟიმის დაცვა

ბავშვს აუცილებლად უნდა ჰქონდეს მეცადინეობისა და დასვენების დოზირებული რეჟიმი. ბავშვის თავის ტვინს შეუძლია დატვირთვით მუშაობა დაახლოებით 30-45 წუთი, ესაა დრო როცა, ყველაზე კარგად ითვისებს, ამის შემდეგ მას აუცილებლად სჭირდება დასვენება, ჰაერზე გასეირნება. ბავშვი ჯერ კომპიუტერთან იჯდეს და შემდეგ სამეცადინოდ გადავიდეს ან პირიქით, არაა სწორი. მეცადინეობას ენერგია სჭირდება. სკოლიდან რომ მოვა ბავშვი, ჯერ ხელები უნდა დაიბანოს, ჭამოს, დაისვენოს ნახევარი საათი მაინც და შემდეგ იმეცადინოს, როცა უკვე სრულად აღდგება სისხლის მიმოქცევა თავის ტვინშიც და ორგანიზმშიც. რა თქმა უნდა, დილის საათებშია ათვისების უნარი ყველაზე მაღალი, თუმცა, როცა ბავშვის დილის ცვლაში სწავლობს, ამ შემთხვევაში, უნდა შეეცადოს მეცადინეობას გვიან პერიოდამდე მორჩეს, რადგან გვიან საღამოს უკვე ათვისების უნარი თანდათან მცირდება.

სკოლის ბუფეტები – ბიზნესი მოსწავლეების ჯანმრთელობის ხარჯზე

საინტერესო ინფორმაცია მოსწავლის მშობლებისთვის

ხშირად გვიჭირს გავაკონტროლოთ ის, თუ რას უყურებენ ჩვენი შვილები და ხშირად გვგონია, რომ ისინი მხოლოდ ეროტიული სცენებისგან უნდა დავიცვათ. არის კიდევ ოთხი ფაქტორი, რაც უნდა გავაკონტროლოთ. ეს არის ძალადობა, საშიში სცენები, ბილწსიტყვაობა, ალკოჰოლი/ნარკოტიკი/მოწევა. სანამ კინოში წახვალთ შვილებთან ერთად გაეცანით Allmovies.ge–ს მშობლის გიდს და მის მიხედვით მიიღეთ გადაწყვეტილება, რომელ ფილმს უყუროთ ბავშვთან ერთად.

გთავაზობთ მშობლის კინოგიდის მეოთხე ხუთეულს, რომელიც ქართული კინოსიახლეების პორტალის allmovies.ge ინიციატივით შეიქმნა და Edu.aris.ge – ის მკითხველი მოსწავლეების მშობლებისთვისაც საინტერესო უნდა იყოს.

რუბრიკა წარმოადგენს მშობლებისთვის ერთგვარ კინოგიდს, თავმოყრილია რამდენიმე ფილმი, რომელიც 5 კრიტერიუმით არის შეფასებული, ეს კრიტერიუმები გვეხმარება მივიღოთ გადაწყვეტილება, ღირს თუ არა მისი ჩვენება ჩვენი შვილებისთვის.

კრიტერიუმებია: 1) სექსი და სიშიშვლე; 2) ძალადობა და სისხლი; 3) უხამსობა; 4) ალკოჰოლი/ნარკოტიკი/მოწევა; 5) საშიში/დაძაბული სცენები.

მაშ ასე, მშობლის კინოგიდის მეოთხე ხუთეული ასეთია:

1. უცხო სამყარო Strangerland   (2016)

2. ჯუნგლების წიგნი   The Jungle Book (2016)

3. ერთობლივი მოგზაურობა 2   Ride along 2 (2016)

4. მონსტრების 10 ბილიკი 10 Cloverfield Lane (2016)

5. ნორმის თავგადასავალი / Norm of the north (2016)

გაეცანით ფილმის შინაარსს და მოგვწერეთ თქვენი დაგაწყვეტილების შესახებ: რომელ ფილმს აყურებინებთ თქვენ შვილს და რომელს არა? დაგვისაბუთეთ თუ რატომ კი, და რატომ არა.

საინტერესო  ინფორმაცია მოსწავლეების მშობლებისთვის

2016 წლის 22 მარტს, გრიგოლ რობაქიძის უნივერსიტეტსა და ქ.თბილისის მერიის ტექნოლოგიური განვითარების ფონდს შორის ურთიერთთანამშრომლობის მემორანდუმი გაფორმდა, რომელიც ითვალისწინებს პროექტის, თბილისის საუნივერსიტეტო კლასტერი, განხორციელებას.

პროექტი, თბილისის საუნივერსიტეტო კლასტერი, გულისხმობს თბილისში აკადემიური და ტექნოლოგიური პროფილის გაერთიანების შექმნას, რომლის წევრიც გრიგოლ რობაქიძის უნივერსიტეტი იქნება. როგორც გრიგოლ რობაქიძის უნივერსიტეტში აღნიშნავენ, კლასტრი აერთიანებს მსოფლიოს წამყვან უნივერსიტეტებს, მათ შორის, გრინვიჩის, არიზონას და ევროპის სხვა საგანმანათლებლო დაწესებულებებს.

პროექტის მიზანია შეიქმნას ონლაინ-კათედრა, სადაც კლასტერის წევრებს შორის მუდმივად განხორცილედება სწავლების ინოვაციური მეთოდების, სასწავლო პროგრამების და გამოცდილების გაზიარება. პროექტში, აკადემიური პერსონალის გარდა, სტუდენტებიც აქტიურად ჩაერთვებიან

დავით აღმაშენებლის სახელობის საქართველოს ეროვნულ თავდაცვის აკადემიაში საერთაშორისო კვირეული გრძელდება. კვირეულში სხვადასხვა ქვეყნის უმაღლესი სამხედრო სასწავლებლის მსმენელები მონაწილეობენ.

კადეტებმა და იუნკერებმა დღეს ჯგუფური დავალებების შესახებ პრეზენტაციები წარადგინეს და ერთმანეთს თბილისის ტურის შესახებ შთაბეჭდილებები გაუზიარეს.

დღესვე, კვირეულის მონაწილეებისთვის ლექციები წაიკითხეს გენერალური შტაბის უფროსის მოადგილემ, პოლკოვნიკმა ომარ ბეგოიძემ, თავდაცვის მინისტრის მრჩეველმა შოთა ღვინერიამ, გენერალური შტაბის J-3 ოპერატიული დაგეგმვის დეპარტამენტის უფროსმა, პოლკოვნიკმა ნიკოლოზ ჯანჯღავამ და წვრთნებისა და სამხედრო განათლების სარდლობის სერჟანტმა, მთავარმა სერჟანტმა კობა ოშხერელმა. ლექციების მთავარი თემები საქართველოს შეიარაღებულ ძალები, სამხედრო გამოწვევები და საერთაშორისო უსაფრთხოება იყო.

ლექციების დასრულების შემდეგ, მონაწილეები ეროვნული თავდაცვის აკადემიის რექტორის მოვალეობის შემსრულებელ, ვიცე-პოლკოვნიკ ვასილ კოპეიკინთან ერთად პრეზიდენტის სასახლეს ესტუმრნენ, სადაც საქართველოს ეროვნული უშიშროების საბჭოს მდივანს ირინე იმერლიშვილს, საქართველოს პრეზიდენტის მრჩეველსა და საგარეო ურთიერთობათა მდივანს თენგიზ ფხალაძეს, საქართველოს პრეზიდენტის ადმინისტრაციის უფროსს გიორგი აბაშიშვილსა და თავდაცვის მინისტრის მოადგილეს ანა დოლიძეს შეხვდნენ.

საერთაშორისო კვირეულის ფარგლებში მონაწილეები საჩხერის სამთო მომზადების სკოლასა და სახელმწიფო სამხედრო სამეცნიერო-ტექნიკურ ცენტრ „დელტასაც“ ესტუმრებიან.

23 მარტს გორის სახელმწიფო სასწავლო უნივერსიტეტს ეწვია პოლონეთის დელეგაცია,

პოლონეთის ელჩი საქართველოში ანჟეი ჩიეშკოვსკი, პოლონეთისა საგარეო საქმეთა მინისტრის მოადგილე იან ჯიეჩიჩაკი, ვარშავის უნივერსიტეტის აღმოსავლეთ ევროპის კვლევის ცენტრის დირექტორი იან მალიცკი, ვარშავის უნივერსიტეტის პროფესორი და ასევე გორის უნივერსიტეტის საპატიო პროფესორი, ბატონი დავით ყოლბაია, პოლონეთის საელჩოს და ვარშავის უნივერსიტეტის წარმომადგენლები.

შეხვედრა შედგა გორის უნივერსიტეტში გახსნილ ვარშავის უნივერსიტეტის ცენტრში. სადაც გამოფენილია უნივერსიტეტში დაცული პოლონური რარიტეტული ფონდი.

გორის უნივერსიტეტის რექტორმა, პროფესორმა გიორგი სოსიაშვილმა და ვარშავის უნივერსიტეტის აღმოსავლეთ ევროპის კვლევის ცენტრის დირექტორმა იან მალიცკიმ ხელი მოაწერეს ურთიერთთანამშრომლობის მემორანდუმს. რომელიც ითვალისწინებს ყოველ წელს გორის უნივერსიტეტიდან 7 წარმატებული სტუდენტის მიღებას ვარშავის უნივერსიტეტში.

ასევე, გორის უნივერსიტეტს გადაეცემა 10 000 წიგნი, რომელიც დაეხმარება სტუდენტებს პოლონური ენის და კულტურის უკეთ შესავლაში. პოლონეთის საგარეო საქმეთა მინისტრმა გამოთქვა სრული მხარდაჭერა და მზადყოფნა, მხარი დაუჭიროს და დაეხმაროს გორის და ვარშავის უნივერსიტეტის შემდგომ თანამშრომლობას.

2016 წლის 21 მარტს აკაკი წერეთლის სახელმწიფო უნივერსიტეტში, დაუნის სინდრომის მსოფლიო დღისადმი მიძღვნილი რამდენიმე ღონისძიება ჩატარდა. ადმინისტრაციული კორპუსის ფოიეში მოეწყო გამოფენა სახელწოდებით: „ჩვენ არ ვითვლით ქრომოსომებს“, სადაც აწსუ-ის სტუდენტებისა და ქუთაისის მეცხრე საჯარო სკოლის მოსწავლეების მიერ მოხატული სიმბოლური წინდები გამოეფინა (ორგანიზატორი აწსუ პედაგოგიური ფაკულტეტის ასოცირებული პროფესორი ნატო ქობულაძე).

აწსუ-ის სააქტო დარბაზში, პედაგოგიური ფაკულტეტის სტუდენტებისა და საზოგადოებრივი ორგანიზაცია „წეროების“ ერთობლივი საქველმოქმედო ღონისძიება გაიმართა, რომელსაც შშმ პირები და სხვადასხვა არასამთავრობო ორგანიზაციები ესწრებოდნენ.

ღონისძიებაზე მაყურებლის წინაშე აკაკი წერეთლის სახელმწიფო უნივერსიტეტის ფოლკლორული ანსამბლი „ადილა“ და პოეტი ახალგაზრდები თავიანთი შემოქმედებით წარსდგნენ. პოეტებთან ერთად, ლექსები შეზღუდული შესაძლებლობების მქონე პირებმაც წაიკითხეს.

ღონისძიება საქველმოქმედო ხასიათსაც ატარებდა, შემოსული თანხა მთლიანად, აწსუ-ის სოციალურად დაუცველ სტუდენტებს, და-ძმა ელგუჯა და მარიამ ძოძუაშვილების დასახმარებლად გადაირიცხა.

კავკასიის საერთაშორისო უნივერსიტეტის სტუდენტური თვითმმართველობის პროექტის – ,,სტუდენტური ცხოვრება 2016“ – ფარგლებში, მუსიკალურ ბენდში ახალი წევრების მისაღებად შიდასაუნივერსიტეტო კონკურსი ჩატარდა.

თვითმმართველობის ახალი პროექტის დახმარებით სტუდენტებს საშუალება აქვთ ძალები სხვადასხვა ინტელექტუალურ-სპორტულ აქტივობებში მოსინჯონ.

ქართული ხალხური სიმღერა, ჭადრაკი, დებატები, რა? სად? როდის?, გრეხეთბოლო, მაგიდის ჩოგბურთი, ფრენბურთი, ქუჩის ფეხბურთი, მკლავჭიდი, იუმორისტული სკეტჩი, თანამედროვე სიმღერა, ქუჩის კალათბურთი, ბილიარდი, პეინტბოლი – ეს იმ შიდა საუნივერსიტეტო კონკურსების არასრული ჩამონათვალია, რომელსაც პროექტი ითვალისწინებს.

კსუ-ის ცნობით, უნივერსიტეტის ბენდი აგრძელებს სტუდენტების მიღებას (ვოკალი, დასარტყამი და კლავიშიანი ინსტრუმენტი). დაინტერსებულ პირებს, შერჩევის საფუძველზე, საშუალება ექნებათ ბენდის წევრები გახდნენ.

პროექტის ,,ინტელექტის დღე” ფარგლებში სკოლის მოსწავლეებისთვის ინტელექტუალური თამაში ,,რა? სად? როდის?” გაიმართება.

პროექტში მონაწილეობის მიღება შეუძლია საქართველოს ნებისმიერი ზოგადსაგანმანათლებლო (კერძო თუ საჯარო) სკოლის  გუნდს. სკოლიდან რეგისტრირდება მხოლოდ 1 გუნდი.

პროექტის ფარგლებში 23 აპრილს,  წიგნის მოფლიო დღეს, 13:00-ზე საქართველოს მასშტაბით ყველა მუნიციპალურ ცენტრში გაიმართება სასკოლო შეჯიბრი ინტელექტუალურ თამაშში „რა? სად? როდის?”.

მუნიციპალური ეტაპის გამარჯვებული სკოლები გავლენ ფინალში და ერთმანეთს 15 მაისს 13:00-ზე თბილისში დაუპირისპირდებიან.

3  საუკეთესო გუნდის ყველა ძირითადი მოთამაშე მიიღებს პრიზებსა და დიპლომებს!

დაინტერესებულ სკოლებს გთხოვთ ეწვიოთ პროექტის ფეისბუქის ოფიციალურ გვერდს  ან  იხილოთ და  შეავსოთ აპლიკაცია.

რეგისტრაციის შედეგები იხილეთ ბმულზე.

განაცხადები მიიღება 16 აპრილის 18:00-მდე.

პროექტს ,,ინტელეტის დღე” ახორციელებენ საქართველოს განათლებისა და მეცნიერების სამინისტრო, საქართველოს სპორტისა და ახალგაზრდობის საქმეთა სამინისტრო და საქართველოს ინტელექტ-კლუბი „რა? სად? როდის?”

დამატებითი ინფორმაციისთვის მიმართეთ: 598 770169/ 577 274461

რა უნდა წავიკითხოთ და რატომ, რა თანმიმდევრობით უნდა ვიკითხოთ, edu.aris.ge-ს რუბრიკაში „ჩემი წიგნი“, გთავაზობთ ასტროლოგ მიხეილ ცაგარელის 5 კატეგორიის მქონე ვერსიას, საიდან უნდა დაიწყოს კითხვა ადამიანმა და როგორ უნდა განვითარდეს იგი როგორც ინტელექტუალურად, ასევე სულიერად:

პირველ რიგში უნდა დავიწყოთ ზღაპრებით

მე მიმაჩნია, რომ  ადამიანი არამხოლოდ ინტელექტუალურად რომ იყოს განვითარებული, ამასთან, ხელი შეუწყოს თავის სულიერ ზრდას, კითხვა პირველ რიგში უნდა დავიწყოთ ზღაპრებით.  საწყისი ბავშვისთვის არის ზღაპრები, რომლებიც არამარტო საოცარ ფანტაზიას ავითარებენ ადამიანში, არამედ ავითარებენ სიკეთისადმი ლტოლვას.

შემდგომ სათავგადასავლო ლიტერატურა

შემდგომ, ცხადია იზრდება ინტელექტი, გონება და ინტერესთა სფერო და შემდეგი უნდა იყოს სათავგადასავლო ლიტერატურა. მათ შორის: ჯეიმს ფენიმორ კუპერის „უკანასკნელი მოჰიკანი“; ჟიულ  ვერნის „საიდუმლო კუნძული“; დანიელ დეფოს „რობიზონ კრუზო“ და რობერტ ლუის სტივენსონის წიგნები.

ამის შემდგომ კლასიკური ლიტერატურა

ამ კატეგორიაში უნდა იყოს მრავალფეროვნება. აუცილებლად უნდა წაიკითხონ: ლევ ტოლსტოი, ანტონ ჩეხოვი, თედორე დოსტოევსკი, ივანე ტურგენევი, ონორე დე ბალზაკი, ო ჰენრი, ამ უკანასკნელის წიგნები, იუმორის გრძნობას ავითარებს.

შემდეგ გადავდივართ ეგზისტენციალისტურ ლიტერატურაზე

ასეთი ლიტერატურა ართულებს ცხოვრებისეულ გაგებას და ადამიანში ფილოსოფიურ და ფსიქოლოგიურ საწყისებს ავითარებს. ცვლის წარმოდგენებს სამყაროს აღქმის და ცხოვრებისშესახებ. უნდა წაიკითხონ: უილიამ ფოლკერი, კობო აბე, ქენძაბურო ოე. პარალელურად, ნუ დაგვავიწყდება პოეზიის სფეროც: გალაკტიონი, ალექსანდრე პუშკინი.

და უნდა დასრულდეს ეზოთერული ლიტერატურით

მიმაჩნია, რომ თუ ზრდა უნდა ადამიანს, ეგზისტენციალიზმის შემდეგ ეზოთერული ლიტერატურით უნდა დასრულდეს ყოველივე ეს. ეზოთერული ლიტერატურა გვასწავლის კოსმიურ კანონებს. თუ უნდა ადამიანს გაერკვეს კოსმიურ კანონებში, რა პრინციპებით იმართება სამყარო, ამისი ცოდნის გარეშე არ უნდა წავიდეს ამ ქვეყნიდან. მათ შორისაა: ლაო ძი, კონფუცი, ზარათუშტრა და მისი მოძღვრებები.

თუ ადამიანი გაჩერდა კლასიკურ ან ეგზისტენციალიზმის დონეზე, მიმაჩნია, რომ სრულყოფილი არ იქნება ბოლომდე, იმიტომ რომ ვერ დაასრულა სრული ციკლი – ზღაპრიდან ეზოთერულ ლიტერატურამდე. ჩემი სამაგიდო წიგნებია ოშოს „მდოგვის მარცვალი“ და ლაო ძის გამონათქვამები. ამ წიგნებთან ერთად ადამიანმა უნდა შეძლოს ზოგიერთი რამის პრაქტიკულად განხორციელებაც.

სხვა სტუმრები რუბრიკაში “ემი წიგნი”

ქეთი არის© გიგოლაშვილი

აწსუ-სთვის უნივერსიტეტის სტატუსის მინიჭების 25 წლის იუბილესთან დაკავშირებით და უნივერსიტეტში აგრარული ფაკულტეტის დაარსების 5 წლის აღსანიშნავად, აგრარული ფაკულტეტის თანამშრომლებმა, სტუდენტებთან ერთად, შეხვედრა გამართეს საქართველოს სოფლის მეურნეობის მეცნიერებათა აკადემიის წარმომადგენლებთან.

ღონისძიება გახსნა აწსუ-ის რექტორის მოადგილემ, პროფესორმა როლანდ კოპალიანმა, რომელმაც აუდიტორიას წარუდგინა სტუმრები: საქართველოს სოფლის მეურნეობის მეცნიერებათა აკადემიის პრეზიდენტი, აკადემიკოსი გურამ ალექსიძე, აკადემიის ვიცე – პრეზიდენტი, აკადემიკოსი ანატოლი გიორგაძე და სამეცნიერო კვლევების აკადემიური დეპარტამენტის ხელმძღვანელი, აკადემიკოსი ელგუჯა შაფაქიძე.

დამსწრე საზოგადოებას სიტყვით მიმართეს უნივერსიტეტის რექტორმა, პროფესორმა გიორგი ღავთაძემ, აკადემიის პრეზიდენტმა, აკადემიკოსმა გურამ ალექსიძემ, აწსუ-ის აგრარული ფაკულტეტის დეკანმა, პროფესორმა ქეთევან კინწურაშვილმა.

შეხვედრაზე განსაკუთრებულად აღინიშნა, რომ 2013 წლიდან, სოფლის მეურნეობის მეცნიერებათა აკადემია და უნივერსიტეტის აგრარული ფაკულტეტი აქტიურად თანამშრომლობენ გაფორმებული მემორანდუმის ფარგლებში. საუბარი იყო დარგის განვითარების მიმართულებით განხორციელებულ და მიმდინარე პროექტებზე, აგრარული მიმართულების, როგორც საქართველოს მთავრობის პრიორიტეტულ მნიშვნელობასა და აქტიური ურთიერთთანამშრომლობის სამომავლო გეგმებზე.

,,ჩვენი თაობის სათქმელი” – ახალი პროექტია, რომელიც კავკასიის საერთაშორისო უნივერსიტეტში სტუდენტებთან და საზოგადოებასთან ურთიერთობების დეპარტამენტის სპეციალისტის, მარინე უგულავას ინიციატივითა და ორგანიზებით ხორციელდება.

23 მარტს სტუდენტები ,,მე და გარემო” თემის ფარგლებში საქართველოს მწვანეთა მოძრაობა – დედამიწის მეგობრების თანათავჯდომარეს ნინო ჩხობაძეს შეხვდნენ. ბიზნესის სოციალური პასუხისმგებლობა, ნარჩენების მართვა, გარემო და ეკოლოგია – შეხვედრისას მომხსენებელმა ამ თემატიკაზე გაამახვილა ყურადღება.

,,ჩვენი თაობის სათქმელი” – პირველი კურსის სტუდენტებზე გათვლილი პროექტია; სტუდენეტებმა პროექტის ფარგლებში თემები მათ მიერ დანახულ პრობლემატურ საკითხებზე დაწერეს. მათთვის საჯარო ლექციები სწორად ამ თემატიკის მიხედვით იმართება.

პროექტის ავტორის თქმით, ,,ჩვენი თაობის სათქმელი’’ სემესტრის განმავლობაში გაგრძელდება და სტუდენეტებს საშუალება ექნებათ სხვადასხვა მნიშვნელოვან და მათთვის საინტერესო საკითხზე მიიღონ ინფორმაცია.